KUCHING: Sepuluh tangki ai udah dianjung ngagai peranak Kampung Sinar Baru, pagi tadi.

Chairman Majlis Perbandaran (MPP) Padawan Lo Khere Chiang madahka tangki ai diberi ngagai genturung pendiau ba menua bebukit.

“Bekal ai endang bisi disambung tang suah suntuk ai laban ai enda deras niki.

“Serak tu kitai nganjung sepuluh tangki dulu sereta ngarapka penanggul sida deka teputar ke alai tangki nya ulih nepu urung 1,500 liter tauka 400 gilin ai,” terang iya.

Khere Chiang bejaku munyi nya lebuh dirandau Suara Sarawak ba pengawa nyuaka tangki ai ngagai sepuluh penerima di Kampung Sinar Baru ditu tadi.