KUCHING: Perintah Sarawak deka seruran beratka pengawa ngena jaku English ba bidang pelajar ba nengeri tu.
Kepala Menteri Datuk Patinggi Abang Johari Tun Openg madah, pekara tu beguna amat nentuka rebak biak ulih nguasa jaku English.

Ku iya, beratka jaku English beguna amat ngambi Sarawak ulih nambahka teknologi pemadu baru.

“Kitai deka seruran meri perati enggau ngena jaku English ba bidang pelajar.

“Jaku English tu beguna amat ngambi komuniti kitai ulih besemekih kelebih agi ba dunya ti mayuh bekenaka teknologi pemadu baru,” ku iya.

Iya mansutka jaku nya ba Pengawa Nutup World Skills Malaysia Sarawak 2019 di Palan Aum Borneo Kuching (BCCK), ditu ensanus.

Abang Johari Tun Openg

Abang Johari madahka Sarawak beguna mayuh agi komuniti ulih nguasa jaku English ngambi bisi mayuh pengereja landik ba bidang teknologi.

“Kitai bisi juluk ati nempa raban ti landik enggau nemu teknologi pemadu baru.

“Tang kitai patut nempa pengereja ti ulih nguasa jaku English,” ku iya madah nyemetak.

Nambahka nya, Menteri Pelajar, Sains enggau Teknolohi Datuk Sri Michael Manyin Jawong madahka Sarawak nyadi nengeri keterubah ba Malaysia ngajar subjek Sains enggau Matematik ngena jaku English.

Ba pengawa nya iya madahka 2,800 pengajar dilatih ngambi besedia ngajar subjek ngena jaku English berengkah Januari taun baru.

“Pengawa nguasa jaku English tu beguna amat kelebih agi ba dunya digital diatu laban mayuh bup manual 100 peratus ditulis ngena jaku English,” ku iya.