KUCHING: Ubah ba rintai Gerempung Main Bol Sarawak (FAS) dikearap ulih meri ‘seput’ baru kelebih agi ba pemansang main bol menua tu.

Menteri Nembiak enggau Lumba Datuk Abdul Karim Rahman Hamzah madahka diri arap endar nengah exco baru nya, mayuh agi penemu baru ulih dikunsi pulaika pemaik tim main bol Sarawak.

“Enti kitai meda chara FAS gawa diatu, tebal agi sida ngatika diri, bepulau sereta nadai madah enti bisi ngatur sebarang program.

“Nya alai aku andal amat sida FAS ulih meri penerang pasal rintai exco baru ngagai Sarawak Sport Corporation (SSC) laban main bol tu sebgai ari main dikerindu mensia mayuh,” ku iya.

Abdul Karim madah munyi nya lebuh dirandau Suara Sarawak pengudah ngatur pejalai nemuai meri basa ngagai Kepala Menteri Datuk Patinggi Abang Johari Tun Openg bekaul enggau ITF World Tennis Tour J3 Mangkuk Kepala Menteri Sarawak (II) Renggat Ke-34 di Wisma Bapa ditu pagi tadi.

EXCO BARU… Abdul Karim madahka exco baru dikearap ulih ngembing sereta meri sanding penemu baru dalam FAS. -GAMBAR NADIM BOKHARI