JAMES Brooke dipadu Sultan Brunei nyadi rajah orang putih Sarawak kena 24 November 1841 pengudah nyaup sida ngedarka raban ti ngelaban Perintah Brunei di Kuching.

Tu mih pun peturun Brooke megai Sarawak pengelama 105 taun sebedau menua tu diserah ngagai Ratu British kena 1 Julai 1946.

Dalam taun 1930-an ekonomi Sarawak balat amat labuh sereta meri empas besai ngagai raban Iban Trackers ngujungka raban nya dikinsil kena 29 Februari 1932.

Lebuh Perang Dunya Kedua nuntung menua kelebih agi rambau soldadu Jipun nyerang menua Lutong, Miri enggau Kuching dalam bulan Disember 1941.

Sida ti kala nyadi Iban Trackers begempung enggau soldadu ari menua Australia ti ngelar diri ‘Z’ nyempulang Major Tom Harrison ngelaban soldadu Jipun ti ngasuh menua siga sereta balat ngenyati rayat nadai ngira indu lelaki, biak enggau tuai.

KERING… Plantun lumur 1, ti diketuaika Lt Col C.J Baird OBE

Iban Trackers

Kena 8 Ogos 1948 iya nya tujuh minggu pengudah penusah nuntung menua Malaya kena 16 June, seraban soldadu datai ari 49 iku Iban Tracker dianjung ke Malaya mantu raban Soldadu Commonwealth ngelaban raban penyelawai Komunis sereta nyaga pengelikun menua nya dalam timpuh tiga bulan lalu sekeda ari sida diau lama agi dia.

Sida ke tinggal betubuh 24 iku numbuhka siti raban soldadu dikumbai Kumpulan 5 ke alai sida udah nya digempung enggau soldadu Gurkha sereta ex-raban Polis 136 lalu dipasuk ke dalam raban soldadu Gurkha, British enggau Kompeni Malayan ti udah lama ditumbuh di Malaya.

Ujung bulan Ogos 1948 bisi 55 iku bansa Iban dianjung gawa ke Malaya dataika tubuh sida manggai 170 iku ba Kem Seginting, Port Dickson.

Genap tiga bulan di Malaya, sida deka dianjung pulai ke Kuching lalu tengan Disember 1948 semua sida betubuh 29 iku setuju ngelanjarka timpuh gawa dia kena nangkup peminta British Guards Brigade sebedau pulai ke Sarawak kena 7 March 1949.

CHUKUP BERANI… Kompani Sarawak Rangers tauka Iban Trackers lebuh menua Malaya siga dalam taun taun 1948.

Pemerintah Malaya sekali agi minta tulung bala Iban Trackers ke alai dalam bulan April 1949, sida betubuh 40 iku dianjung ke Malaya pengelama enam bulan.

Berindik ari pemintar, penyikar enggau pemerani sereta pemanah pengawa raban nya ngasuh sida di Malaya andal sereta nginjau 301 iku agi raban nya ngintu pengelantang enggau nyaga pengelikun dia.

Sepemanjai timpuh nya mega, sepenyampau 1,168 iku Iban Trackers nembuka pengawa sida lalu lapan iku ditemu bebadi nyawa, sepuluh bakal seraya lima ke bukai lenyau nadai ditemu penunga.

Iban Trackers keterubah bebadi nyawa benama Tracker Jaweng Jugah (12 March1951) ari menua Ulu Gaat, Kapit. Niang diambi gawa enggau 42 iku komando orang putih ti dikangau ‘Commando Royal Marine’ ke alai tudah kena leka seterum tesat ketegal pengilap siku ari soldadu lebuh ngetanka tanah Malaya.

Ba taun ke sama, Tracker Awang Rawing ari Skrang udah diberi pingat Pingat George Cross, iya nya Pingat Pemadu Tinggi Raban Soldadu Britain enggau Pingat Seri Pahlawan Gagah Perkasa (SP).

Pingat nya udah diberi ngagai Awang pengudah iya mujur nyelamatka siku kaban Platun 10, Kompani D, Batalion 1 Worcestershire Regiment, benama Private Hughes pengudah platun sida diserang raban penyelawai kena 27 Mei 1951.

Tu pingat keterubah diberi dalam sejarah ngagai siku soldadu Malayan, Awang Rawing, sereta semina siti nya aja kala diberi sepemanjai penusah perang nuntung menua Malaya.

Kena 3 November 1952, tracker Menggong Panggit dipadu nyadi pemangku lans-koperal ba siti ari plantun Iban Trackers, iua diasuh nyadi kepala dalam sebengkah operasyen nyerang siti kem pengudah komander platun sida, Leftenen RRG Bald ari battalion 1 The Cameronians (Scottish Rifle), parai tekala nya kena timbak ba serang keterubah.

Ketegal pemerani Menggong nya, iya lalu diberi basa enggau Pingat George Medal. Mayuh pingat enggau gelar ke bukai udah diberi ngagai raban Iban Trackers kelimpah ari ke diterima Awang Rawing enggau Menggong Pait.

BUJANG BERANI… Trackers Dani, Tampi enggau Dani ba Kroh, 1951.

Sarawak Ranjers

Semua tuai enggau ketuai ba Sarawak lebuh nya chukup enda puas ati enggau hak kuasa soldadu setengah aja diberi perintah Malaya.

Kebuah pia laban sida dekaka semua anak lelaki ke berambunka seput ngetanka Malaysia diberi kuasa penuh nitih pematut sereta setipak enggau pemesai tanggungpengawa nyengkaum identiti bansa.

Iban Trackers diidupka baru kena 1 Januari 1953 tang dibali nama ngagai Sarawak Ranjer (unit Malaya) dipegai Lt Col C. J Baird ti nyadi komander keterubah megai raban soldadu nya.

Taja nama kangau udah diubah tang pengawa dikereja mengkang baka lebuh sida nyadi Iban Trackers suba ti pintar runding ngatur pengawa, sikar sereta berani lebuh betempuh dalam kampung.

Chara sida ngatur bala Iban mega narit ati bala tuai British kelebih agi lebuh ngatur serang, nyidi bekau bala penyelawai ba babas enggau kampung sereta nadai kala surut ngelaban munsuh.

SIKAR BEPERANG… Awang Rawing, penerima Pingat George Cross ketegal pemerani ngidupka seput Private Hughes.

Tu ngujungka sida diambi British nyadi soldadu, indah baka sida ke diambi nyadi soldadu Gurkha suba laban ditemu chukup kering ati, berani sereta bepenemu enggau bepeneleba bejalai sebelah babas.

Lebuh raban Sarawak Rangers (Unit Malaya) dikinsil kena 31 March 1960 tang hari siti udah nya, 1 April, iya ditumbuh baru meruan ngena nama ke sama tang digelar unit kuasa tanah timur, nyadi sebagi ari unit Soldadu British.

Udah nya sida ulih diambi gawa ba sebarang alai serata dunya baka kuasa Soldadu Gurkha. Hari ke sama mega Gabenor meri basa ngagai Sarawak Rangers enggau maduka siku pemesai tinggi bansa Iban, 2nd Lt James Tomlow Isa.

Kenang pasal bala bujang berani ti begadai seput ngetanka pengelikun menua patut ditampung ngagai rebak baru ngambika sida nemu pemesai reti pengawa ditegika sida ke tuai dulu.

Kena 15 September 1963, Sarawak Rangers pan dikinsil lalu hari siti, 16 September, menua Malaysia ditumbuh lalu batalion lumur satu, Malaysia Ranger ke alai lebih ari 100 iku Sarawak Rangers (Kuasa Tanah Timur) enggau ati tebuka namaka diri ngagai unit baru nya seraya ke bukai mulaika diri ke menua sida empu di Sarawak.

Bala Iban Trackers enggau Sarawak Rangers bisi chara enggau pemberani ti amat nyelai sereta bebida ari raban soldadu bukai lebuh beperang.

Dalam timpuh 12 taun sida bejalaika pengawa, penyampau tubuh ke bebadi balat ngasuh bala kompani soldadu bukai alit ati laban jauh kurang, semina 20 iku aja ke bebadi nyawa enggau 25 bakal.

Penyampau tu chukup ngasuh dini-dini kompani temegah laban ari pemerani enggau pengering sida udah dibasa ngena pingat enggau midul chukup tinggi baka George Cross, George Medal, Military Medal, British Empire Medal, 19 setipikit nyubuk (pengitipan) enggau 21 iti setipikit ketuai komander.

Iban Trackers endang ba rintai mua belama maya beperang lalu kandang 12 taun nya mega sida nadai ngetu beperang. Taja penyampau tubuh sida ke agi idup diatu nadai entu mayuh, tang jasa enggau pemerani meruan dikenang sereta nyadika buah mulut mensia mayuh, ke chunto enggau teladan ngagai rebak baru.

Pingat ke tanda basa enggau ngenang jasa, ngangkatka nama sida pegari nyadi bujang berani enda chukup enti jerita pemerani enda ditampung ngagai uchu ichit kitai awakka sida neladan pengering ati enggau ke peransang semengat diri.