KUCHING:  Gerempung Bansa Dayak Sarawak (SDNU) pampang Kuching terus chakah dalam ngerembaika penerang nyemetak pasal palan pelajar tinggi (IPT) kelebih agi ungkup bansa Dayak.

Chairman SDNU pampang Kuching Thadeus Ling Allu madahka, program Ekspo Pelajar keterubah tu diatur sida dikearap ulih meri empas positif ngagai apai indai enggau nembiak sekula.

“Tu keterubah kami ngatur aktiviti baka tu laban deka muka runding enggau besaup mantu bala nembiak Bansa Dayak ti diau ba mengeri nemu pasal pemesai guna pekara pelajar kelebih agi kitai Iban.

“Kami andalka penemu pasal pelajar tinggi tu ulih datai ngagai nembiak kitai Dayak ti diau ba Kuching, Kota Samarahan enggau Serian,” ku iya.

Thadeus bejaku munyi nya lebuh bejadika Ekspo Pelajar ti diatur ba Balai Siol Kandis, Petra Jaya ditu, kemari.

PENGAWA MANAH…Thadeus (kanan) nyuaka setipikit ngagai siku penyereta program Ekspo Pelajar ti diatur ba Balai Siol Kandis, Petra Jaya ditu, kemari.

Tandu iya, enggau ekspo tu bala nembiak ti datai ari menua pesisir ti nitihka apai indai sida bekuli di mengeri endang diasuh sereta bekunsika penemu ngambi ulih seikas bala nembiak bukai ti endang diau ba mengeri.

“Program ti baka tu beguna amat ngagai anak-anak kitai ngulihka penemu sentang pekara nyambung pelajar sida ngagai renggat pelajar tinggi tauka universiti.

“Fokus kami endang ngagai nembiak ti baru tauka deka tembu Sijil Pelajaran Malaysia (SPM) enggau Sijil Tinggi Persekolahan Malaysia (STPM).

“Aku arapka apai indai ngambi peluang tu sereta bekunsi pekara pasal pelajar sekula ngagai anak sida,” ku iya.

Kelimpah ari nya, iya mega nerangka SDNU endang deka meri kerejasama dalam mantu Bansa Dayak ari menua pesisir ti seranta pengudah mindah ngagai mengeri.

“Kami gerempung ukai dikuasa perintah ti ditumbuh dikena mantu Bansa Dayak ngulihka pengidup meruan lebuh ti mindah ngagai mengeri.

“Pia mega, kami sedia bekerjasama enggau Gerempung Ketuai Raban Bansa enggau Tuai Rumah Bansa Iban Bagi Menua Kuching dalam napi penanggul ti ditapi bansa kitai ba mengeri tu,” ku iya.

Sama bisi datai ba pengerami nya kemari Ketuai SDNU pampang Siol Pani Igoh, bala komiti enggau mensia mayuh.

Entara aktiviti ti digaga kemari licha pelajar ari siku Pensyarah Akedemik Palan Pematih Pengajar (IPG) Kampus Tun Abdul Razak Dr Stanley Abang sereta palan mandangka pekara pelajar ari 13 buah ejensi pelajar tinggi enggau vokasional.