KUCHING: Gerempung Bansa Dayak Sarawak (SDNU) endang gerah jari sedia meri kerejasama ngagai Gerempung Ketuai Raban Bansa enggau Tuai Rumah Bansa Iban Bagi Menua Kuching (Pemaik) dalam mutarka penanggul Bansa Iban ti seranta di menua tu.

Chairman SDNU pampang Kuching Thadeus Ling Allu madahka gerempung sida dipinta ngambi bagi dalam mutarka penanggul tu.

“Perintah nengeri numbuhka Pemaik ngambika mutar penanggul Bansa Iban ti seranta diau ba mengeri.

“Nya alai, SDNU dipinta ngambi bagi sereta bekerjasama dalam mutarka penanggul tu,” ku iya.

Thadeus bejaku munyi nya lebuh ditanya pemberita ba Ekspo Pelajar ti diatur ba Balai Siol Kandis, Petra Jaya ditu, kemari.

Tambah iya, sida endang besedia sereta nyikap diri mantu Pemaik dalam ngatur mayuh pengawa begulai ngambika ulih ngelempung tating penanggul ti ditapi Bansa Iban di menua tu.

“Kami endang deka begulai dalam mutarka penanggul penyeranta bansa kitai ti bisi di mengeri tu,” ku iya.

Pemaik tu gerempung ti ditumbuhka perintah dikena ngiga sereta mantu Bansa Iban ti seranta lebuh mindah ari kampung sida ngagai mengeri ngambi bulih pengidup ti meruan agi.

Entara pekara ti nyadi perati sida bekaul enggau peranak Bansa Iban ti ngentak berumah ba tanah pendam SDNU di Jalai Chawan.

Chairman SDNU Kuching, Thadeus Ling Allu (kanan).
FOTO: NURUL FADZLYN