“Nya alai, STU ngansak perintah kediatu ngemeratka agi pengawa ngemanahka internet di Sarawak lebih agi di menua pesisir.”

KUCHING: Sarawak Teacher Union (STU) nimbal manah penemu Sapit Menteri Pelajar Teo Nie Ching ti dekaka pengawa ngajar enggau belajar (PdP) mengkang diteruska ngena chara ‘online’ nyema sekula ditutup ketegal gawa hari balat besebun.

Presiden STU Macky Joseph madah, chara ‘google classroom’ nyadi jalai muntang dikena nganti PdP dalam kelas maya sekula ditutup.

“Nya alai, STU ngansak perintah kediatu ngemeratka agi pengawa ngemanahka internet di Sarawak lebih agi di menua pesisir.

“Kitai enda ulih enda nentuka anak kitai mengkang belajar sereta enda masau jam ketegal sekula ditutup maya hari balat besebun,” pia ku iya madah ngagai pengarang berita, kemari.

Macky madah, sekula ulih mai semua pengajar enggau nembiak belajar ngena chara baru nya.

“Amat pengawa ngaduka PdP nengah chara online enda semua sebaka ba kelas tang chara tu endang pulaika penguntung ngagai nembiak sekula ari ke enda belajar,” ku iya madah baru.

Tang taja pia, ku iya, pengelaju internet di Sarawak empai tentu ulih dikena bejadika perambu nya.

Ketegal nya, iya madah, STU ngansak perintah ke megai diatu anang laun nyendiaka servis internet ke pemadu manah ngagai nengeri tu ti lebih agi diguna ba kandang menua pesisir kelimpah ari mengeri aja.

Macky Joseph