KUCHING: Perintah Sarawak udah nganjung ‘fomula’ bekaul enggau royalti minyak enggau gis nuju Perintah Besai.

Kepala Menteri Datuk Patinggi Abang Johari Tun Openg madahka ‘fomula’ tu model baru dikena Sarawak ngulihka asil.

“Aku bisi ‘fomula’ baru laban Petronas sebuah serikat entarabansa tang ari nya kitai ulih ngulihka belanja.

“Kedua ‘fomula’ tu sebagi ari utai ti mansutka ‘bahan mentah’ ngagai Petronas kelebih agi gis,” ku iya.

Abang Johari bejaku munyi nya lebuh ditanya pemberita ba Pengerami Ngitu Hari Orang Indu renggat Nengeri Sarawak ba Palan Aum Borneo Kuching (BCCK) ditu, pagi tadi.

Datuk Patinggi Abang Johari Tun Openg

Ku iya, Perintah Besai nyangka deka lenyau mimit pengulih ari ‘fomula’ tu tang udah tentu Perintah Nengeri begunaka pengulih ti sebaka.

“Aku udah nganjung ‘fomula’ tu nuju Perintah Besai ke alai Sarawak ulih ngambi bagi ari pengulih nya,” ku iya.

Tandu Abang Johari, jaku Menteri Besai Tun Dr Mahathir Mohamad ti enda ulih meri 20 peratus royalti minyak enggau gis ngagai Sarawak ukai dipinta.

“Kitai nadai minta 20 peratus tang Pakatan Harapan ti bedanji deka meri.

“Lebuh sida bedanji munyi nya kitai nerima, tang diatu lain mega cherita,” ku iya.