KANOWIT: Perintah Gempung Parti Sarawak (GPS) endang perintah ungkup semua bansa bepelasarka rayat pupu bansa di nengeri tu.

Nya alai Adun Machan Allan Siden Gramong madahka, nadai jaku pilih kasih dalam GPS lebuh ngatur projek, agih belanja enggau pekara bukai dalam perintah nengeri tu.

“Kitai di Sarawak bisi mayuh bansa enggau pengarap. Nya kebuah manah amai bepelasarka GPS ti nadai ngelaungka, nadai ngira bansa enggau pengarap.

“Tu meh tanggungpengawa aku nyadi pengari rayat di Dun Machan iya nya mantu semua bansa laban rayat ditu ba baruh jaga aku,” ku iya lebuh bejaku nyuaka chek projek mit menua pesisir (MRP) ngagai lima buah Tepikong China di sitak Dun Machan, lemai kemari.

Pengerami nya diatur ba sebuah restoran di pasar.

NADAI BECHIPING…Allan (dua kanan) nyuaka chek MRP ngagai siku pengari tepikong.

Lima buah tepikong nya Tepikong Komiti Pengatur Pengelikun enggau Pemansang Genturung Pendiau (JKKK) Fung Kung, Tepikong JKKK Tai Wong Kung, Tepikong JKKK Mau San Kanowit, Tepikong Hock Ann enggau Komiti Tepikong China Lukut.

Allan madah, perintah GPS deka terus komited nyaga penyerakup enggau pengelantang pupu bansa di Sarawak lalu tetap adil.

“GPS enda deka meri fokus ngagai sebuah bansa aja tang semua bansa deka dijaga lalu diberi bantu projek enggau adil.

“Kitai dekaka pupu bansa enggau pengarap di nengeri tu nyadi pelasar pengering GPS ngambika terus megai nengeri tu nengah konsep ‘Satu Dalam Kepelbagaian’ baka ti dipeda ba dalam kabinet diatu,” ku iya.

Nangkan nya, iya ngelalau bansa China ba pelilih nya terus meri sukung ti tegap ngagai GPS ba pengawa bepilih nengeri ti deka datai dalam ngeringka agi nyawa Sarawak nengah GPS.

“Nadai parti bukai ari GPS ti nemu peminta enggau hak rayat di menua tu. GPS nyadi pilih ti pemadu manah ungkup rayat di Sarawak,” ku iya.