MUKAH: Lebih 100 iku peranak Rumah Budin, Kampung Sungai Seduan, Mukah ditu semina tinggal gari dipunggung sepengudah rumah panjai sida dituntung penusah angus, pagi tadi.

Nitihka ripot ari Palan Operasyen Opis Bomba enggau Penyah Penusah Malaysia Nengeri Sarawak, penusah ke nuntung urung 9 pagi tu dipelabaka nyadi bepun ari antara bilik lumur enam enggau tujuh.

“Ba penusah tu, rumah panjai nya angus lengis.

“Tu ngujungka 105 iku peranak rumah panjai nya nadai agi rumah,” pia ku penerang ari opis bomba nya tadi.

Ripot nya mega madah, nadai penusah nabanka nyawa nyadi.

Taja pan pia, naka berita ditulis, pun penusah nya agi benung dipansik.

ANGUS LENGIS…Gaya Rumah Budin, Kampung Sungai Seduan di Mukah sepengudah angus, pagi tadi.