KAPIT: Perintah nengeri (GPS) deka lebih chakah agi ngadu pemansang ba menua pesisir ngambika rayat ba endur tu bela ngasai ke penyamai baka ba mengeri ke udah mujur ari sukut insfrastruktur enggau ke bukai.

Sapit Kepala Menteri Sarawak megaMenteri Betanam Betupi Moden, Tanah Adat enggau Pemansang Menua Pesisir, Datuk Amar Douglas Uggah Embas madah sitak menua pesisir deka dikemansang bebendar agi nengah projek Tranformasyen Menua Pesisir (RTP) ke diketuai Kepala Menteri Sarawak, Datuk Patinggi Abang Johari bin Tun Openg.

Uggah madahka tu lebuh iya bejadika pengerami Agrofest Kapit 2019 ke diatur ba Kompleks Perintah Nengeri kemari.

“Enti dibanding enggau mengeri besai ke endang udah mansang diak menua pesisir bedau engkeman bulih bekal ai ti beresi enggau bekal karan 24 jam lalu deka terus diberi ngagai rayat dudi hari ila,”

“Tu pemansang ke dikeingin rayat lalu GPS deka terus ngemenuhka janji ke udah disemaya,”

Uggah nyuaka anugerah ngagai Fransiska Blantau ke udah mujur bejualka pua kumbu nengah program ke udah dipejalai Opis Betanam Betupi Kapit.

“Nya alai, Abang Jo udah nubuhka Urda (Ejensi Pemansang Hulu Rajang), HAD (Ejensi Pemasang Tanah Tinggi) ungkup Baram, NDA (Ejensi Pemansang Utara) ungkup Limbang enggau Lawas, SDA (Ejensi Pemansang Selatan) ungkup Kuching enggau Samarahan,”ku iya

Uggah madahka semina orang ke buta enggau tuli ngumbai Kapit tu enda mansang ari sukut insfrastruktur .

Sepenyampau RM1.5 bilion udah diagih perintah nengeri dikena ngemansangka menua pesisir nengah Urda.

Kelimpah ari nya, Uggah madahka pengerami baka Agrofest nyadika siti pelasar ba pengawa betanan betupi dikena bedagangka asil ari pengawa betanam betupi nitihka skim ke udah dipadah perintah.

Pengawa betanam tu siti ari dagang ke ulih nyungkak penatai pemisi lalu ukai semina betanam betupi aja tang begaga ke asil kraf jari , nginjin pemakai baka dagin, ikan, sayur enggau buah lalu berambaika leka jaku ‘Pertanian adalah perniagaan’

Raban orang betanam betupi mega tau belajar ngulihka penemu baka ni ngaduka sayur ditanam nengah chara moden-fertigasyen.

Ba pengerami tu tadi, Uggah udah ngagihka RM2 juta dikena ngaduka utai tanam nengah chara moden baka fertigasyen lalu RM2 juta dikena ngaduka nanam leka rian ‘Musang King’ enggau udah ngemendarka palan ngumpul,nginjin,,mungkus enggau nyual pemakai baka sayur ,buah,ikan enggau dagin deka digaga ba Kapit enda lama agi.

Agrofest Kapit 2019 tu diatur ambika raban opis perintah kelebih agi Opis Betanam Betupi ulih nerangka enggau silik agi bekaul enggau pengawa betanam betupi.

Nangkan ke nya, program baka tu mai bala orang betanam nambahka penemu nengah chara kos enggau demostrasyen lalu dikearap ulih narit minat bala orang ke biak sama besemekih ngaduka pengawa betanam betupi tu.

Sama bisi datai, Dr Gluma Saban, Ketuai Sekyen Komersial enggau Palan Latih Betanam Betupi Moden, Kaban Parlimen Kapit, Datuk Alexander Nanta Linggi , Kaban Adun Bukit Goram, Jefferson Jamit Unyat,Kaban Adun Pelagus,Wilson Nyabong Ijang, Sapit Residen Kapit, Galong Luang, Penulung Directur Opis Betanam Betupi Kapit, Badin Unor enggau temuai ke dipebasa bukai.