KUCHING: Unit Pekara Pengarap Bukai (Unifor) bisi nerima 667 peminta bekaul enggau belanja kenyau April 2017 nyentukka diatu.

Sapit Kepala Menteri ti mega Menteri ti megai Tanggungpengawa ke atas Unifor Datuk Amar Douglas Uggah Embas madahka raban sida majak nerima peminta ari pengarap bukai laban Unifor nyau majak dikelala diatu.

“Aku seruran deka minta ngagai perintah nengeri meri agih belanja mayuh agi laban ba taun 2017 ngagai 2018 Unifor udah ngemendarka 373 peminta nyeruri enggau nyeleti rumah sembiang ti beungkus RM50 juta.

“Lalu taun tu Unifor udah ngemendarka RM60 juta agi dikena tuju ti sebaka nyengkaum agih belanja tu dipadahka Kepala Menteri Datuk Patinggi Abang Johari Tun Openg maya iya nemuai ngagai selampur Sarawak,” ku iya

Uggah bejaku munyi nya lebuh bejadi Pengerami Makai Lemai Gerija St Francis Kota Samarahan ditu, kemari.

NYADI BEREKAT…Datuk Amar Douglas Uggah Embas (lima kanan) nyuaka replika chek RM500,000 ngagai Gerija St Francis ba Pengerami Makai Lemai Gerija St Francis Kota Samarahan ditu, ensana.