Infomasyen dikerembai meseti betul

KUCHING: Unit Komunikasyen Perintah Sarawak (Ukas) enggau raban media patut meri infomasyen ti betul ngagai rayat kelebih ari ba menua pesisir.

Menteri ba Opis Kepala Menteri (Pekara Korporat enggau Ukas) Abdullah Saidol madah endang udah nyadi tanggungpengawa Ukas ti ngarika perintah Sarawak meri penerang ti betul ngagai rayat.

“Berita ti ngembuan penereng ti salah ari pun jalai berita nya lalu nadai chara nguji mutarka isu nya, semua deka meri runding ti salah mega ngagai pekara nya.

“Kitai enda ulih nyalahka rayat enti sema sida nerima penerang ti salah laban penerang nya endang udah salah ari pun,” ku iya.

Abdullah Saidol madah munyi nya ba aum pemberita sebedau Pengerami Makai Lemai Ukas Genap Setaun bepalan ba sebuah hotel ditu, kemari.

RICHAH…Abdullah Saidol begulai enggau temuai ke bukai beperindang ba Pengerami Makai Lemai Genap Setaun Ukas ba UCSI Hotel Kuching.- Gambar NADIM BOKHARI

Nangkan nya ku iya, Ukas nadai diberi tanggungpengawa ngemetul berita ti salah datai ba rayat.

“Tang, sida udah diberi tanggungpengawa ngumpul semua penerang ari berita ti salah nya ngarika perintah.

“Kebuah pia ngambika sida ulih ngiga penerang ti silik sereta infomasyen tambah lalu mansutka berita ti betul,” ku iya.

Nya alai, Abdullah Saidol minta tiap raban Ukas bekerejasama enggau raban media bukai ngambika sida ulih meri berita ti betul.

“Kelimpah ari nya, kami ba opis menteri deka Ukas sama beratika penusah ditapi rayat menua pesisir sereta enda semina duduk ba opis.

“Ambika chunto, enti pekara nya begunaka sida nujah menua ti jauh sereta nepan perau, kami enda ngira laban nya endang patut digaga sida ngulihka infomasyen,” ku iya madah enggau nyemetak.

Berebak enggau nya, Pemangku Direktor Ukas Datuk Norhayati Mohd Ismail madah taja baru setaun sida bediri tegap ba Opis Kepala Menteri, tang mayuh pekara ke udah digaga sereta deka diatur sida.

“Ngarapka raban Ukas bebendar agi gawa lalu semak enggau rayat laban kitai mih orang ke meri sereta ngumpul berita ti betul ngagai sida,” ku iya.

Rambau pengerami nya, bisi 145 iku raban Ukas selampur Sarawak sereta 31 iku Sekretari Politik enggau raban media ngerichahka pengerami nya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak