Perengkaguna ba Skim Padi deka dikemanah

“Ubah tu patut digaga dikena nentuka sitak nya lebih proaktif ngeluarka padi.”

BETONG: Semua perengkaguna nyengkaum sistem parit enggau entali ai ari Opis Parit enggau Entali Ai (JPS) ba sitak Skim Padi di mengeri tu deka dikemanahka agi.

Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah Embas madahka ubah tu patut digaga dikena nentuka sitak nya lebih proaktif ngeluarka padi.

“Bisi 40,000 hektar sitak ba baruh skim tu nyengkaum 500 hektar di Tanjung Sebukut.

“Mayuh sitak skim tu napi penanggul perengkaguna enggau penanggul produktiviti parit sereta entali ai ti enda tentu manah,” ku iya.

Uggah bejaku munyi nya pengudah ngabas sitak skim padi di JPS Tanjung Sebukut di Spaoh ditu, kemari.

Ku iya, ba Tanjung Sebukut aja asil ti diulihka sida ti nanam padi dia semina baruh dua metrik tan sehektar.

“Kitai meseti mai ubah ba chara baru enggau ngaga sistem parit ti manah agi.

“Kami agi nganti ripot ari sekim bukai lalu sebagi ari ripot nya dipelaba tembu 11 September tu ila,” ku iya.

Nangkan nya, Uggah nambah sempekat pemerti ati MoU entara sektor peribit enggau bala orang bumai ba pemansang bumai ba palan Sekim Padi JPS Tanjung Purun deka disain kena 5 September tu.

“Tu kali keterubah kami ngaga sempekat nya lalu enti mujur kami deka ngena pemansang nya ba palan bukai,” ku iya.

Dulu ari nya, Uggah ngatur aum mit begulai enggau komiti pengatur Sekim Padi Tanjung Sebukut ti diketuaika Sekretari sida iya nya Abdul Karim Jawi.

Sama datai Sekretari Politik Kepala Menteri Dr. Richard Rapu enggau Injinir JPS Bartholomeu Emily Ayu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak