KUCHING: Pangka pemansang teknologi ti majak ngerembai kitai patut ngajar bala nembiak angkunka pelajar Sains, Teknologi, Injinir enggau Matematik (Stem) dikena ubah ba pelajar enggau lebuh maya ngiga pengawa puang.

Kepala Menteri Datuk Patinggi Abang Johari Tun Openg madahka teknologi diatu udah mega meri empas ngagai kaul, pekara betanam betupi enggau mensia mayuh.

“Diatu semua anak mit nemu ngena telefon binching ti mandangka tikas pengidup kitai majak berubah.

“Bai bala anak kitai ngena teknologi ba pekara betanam betupi nengah ‘Internet of Thing’ (IoT) ngambika ulih nambah penatai pemisi ruang bilik,” ku iya.

Abang Johari bejaku munyi nya lebuh bejadi Pengerami Karnival Stem Satok ba Sekula Primari Rakyat ditu, kemari.

JAKU PERANSANG…Datuk Patinggi Abang Johari Tun Openg

Ku iya, pekara teknologi diatu mega manah dikena bedagang.

“Diatu kitai tebilang ninga pasal dagang ‘online’ ke alai kitai ulih bejual produk di Sarawak ngagai menua luar lalu bayar ulih ngena Sarawak Pay.

“Tu nunjukka ubah ba dagang udah enda sebaka baka kelia.

“Perintah deka tetap meri fokus ngagai pemadu guna teknologi nengah raban sekula, nembiak, Kaunsil Multimedia Sarawak (SMA), Unimas enggau raban bukai bekaul enggau Stem tauka teknologi,” ku iya.

Tandu iya, bala nembiak ti belajar nitihka kus vokasional nengah teknologi mega jampat gawa laban penau sida nerima peminta ti tinggi.

Ba pengujung dia iya madahka meri agih belanja RM50,000 ngagai SK Rakyat enggau RM50,000 agi nuju Gerempung Apai Indai enggau Pengajar (PIBG) sekula nya.

Sama bisi datai Mandal Chanselor Unimas Profesor Datuk Dr Mohamad Kadim Suaidi, Kaban Parlimen Petra Jaya Datuk Seri Fadillah Yusof, Kepala Pengajar SK Rakyat Siti Ajar Yasin enggau bala bukai.