BETONG: Pekit ti diatur ba rumah panjai ulih nyadi inisiatif dikena ngelakuka pengawa betanam betupi ti moden sereta nerenakka ulah ngetanka pengawa main asal.

Sapit Kepala Menteri Datuk Amar Douglas Uggah Embas madah ambika banding Program Lumba Basikal Bukit Paku Renggat Kedua ti diatur ba Rumah Panjai Francis Nyanggau Penom ensanus siti ari program ti ulih nyadika chunto ngelakuka pekara nya.

“Kami ngarap taun baru mayuh agi pengawa ulih dibai kami ba program bakatu nyengkaum eksibisyen pasal betanam betupi.

“Nengah tu, kami ulih mandang ngagai peranak rumah panjai sereta mensia mayuh ti datai ngagai program nya chara enggau pengelebih ari betanam betupi ti moden,” ku iya ti mega nyadi Menteri Betanam Betupi, Tanah Adat enggau Pemansang Kandang Menua.

Uggah mansutka jaku nya ba pengawa nutup Lumba Basikal Bukit Paku Renggat Kedua di Rumah Panjai Francis Nyanggau, Penom, ensanus.

KENANG.. Uggah (empat kanan) begambar kenang enggau bala pemenang Lumba Basikal Bukit Paku Renggat Kedua disempulang Friday (lima kiba) enggau bala bukai.

Nangkan nya, taja lumba basikal nya siti program ti mit, tang Uggah chukup gaga enggau pemayuh mensia ti datai ngerichah agi Lumba Basikal Bukit Paku Renggat Kedua nya.

“Peranak ari panjai nya ti mega rumah panjai aku empu mayuh mantu ngatur pejalai lumba nya.

“Bisi entara sida ke rindu ati enggau pengawa nya muka alai diau (homestay) ngagai bala temuai kelimpah ari ngaga palan bedaja sereta nyual asil pengelandik jari sida,” ku iya.

Diatur berengkah Hari Dua nyentukka malam ensanus, Rumah Panjai Francis Nyanggau di Penom nya nyadi palan begelumu, ukai semina bala penyereta lumba basikal tang sida sebilik sereta bala temuai.

Kelimpah ari nya, Uggah mega madahka nengah pekit main asal ti dipejalai nyerumba program lima hari nya, peranak rumah panjai nya mantu ngelaku sereta ngetanka pengawa lama baka ngajat, betabuh, begendang sereta ngenahka pemakai asal.

Nitihka penerang, urung 90 pelumba basikal menua Malaysia nyereta lumba nya.

Rambau lumba nya, dua penyereta ari Kuala Lumpur, Muaz Abd Rahim menang Kategori Tebuka Lelaki lalu Mohd Zukri Tahir menang kategori Veteran.

Pelumba basikal menua Eason Chong Kai Ceng menang ba kategori Junior lalu Tay Choon Lian menang ba kategori Sarawak Tetutup.

Udah nya, Andrew Bilong ari Spaoh menang ba Kategori Betong Tetutup.

Tembu pekit nya, Uggah disempulang bini iya Datin Amar Doreen enggau Residen Bagi Menua Betong Friday Belik nyuaka perais ngagai bala pemenang lalu nyabut tikit benasip alai perais utama iya nya dua buah motosikal.

Uggah mega madahka lumba basikal nya deka diatur ba endur ti sama urung bulan Julai tauka Ogos taun baru.