SARATOK: Penusah bebadi ba jalai alun ke nuntung enam iku peranak menua Kabong nyengkaum dua iku ari Empayang, Roban nerima perati Adun Kabong, Mohd Chee Kadir.

Apin lama ke udah beserimbai enggau Program Nemuai Nempa Kaul ti diatur Palan Pusat Khidmat Adun N.40 Kabong dia Chee Kadir bisi ngabas sida tu ke benung diperubat ba sepital.

“Program Nemuai Nempa Kaul baka tu diatur nadai ngira maya, ukai tuju politik tang endang udah nyadi tanggungpengawa aku ti mangku pengawa nyadi pengari rayat ditu.”ku iya.

Chee Kadir mansutka penemu nya lebuh pejalai iya nemuai ngabas peranak menua dipegai iya ba Sepital Sarikei apin lama ke udah.

Iya mega madahka, tu meh siti ari chara iya nunjukka penyiru enggau pengibuh ngagai rayat dipegai iya kelimpah ari chara bukai.

Rambau pejalai nemuai nya mega Mohd Chee Kadir bisi meri pemeri ari kuchik iya empu ungkup bala sida ti berubat ba sepital dikena ngelempungka tating belanja sida.

“Ngarapka pemeri menggal mit ari aku tu ulih mantu sida sebuat ari sukut belanja.

“Nya alai, arapka semua sida ulih gerai enggau jampat baka selama,” ku iya.

ARAP JAMPAT SUMAN…Vonicachu Untan 37 taun ti patah pah nyerita baru ngagai Mohd Chee Kadir bakani penusah nuntung sida.