KUCHING: Parti Keadilan Rakyat (PKR) pampang Stakan keran deka mantu Pakatan Harapan (PH) ngerampas penuduk sitak Kunsil Negeri (DUN) Stakan ba Pengawa Bepilih Negeri (PRN) ti deka datai.

Ketuai pampang ke baru dichiri, Ir Numpang Suntai madah juluk nya nyadi siti pekara ke pemadu dikemerat.

“Mantu PH menang ba DUN Stakan nyadi siti pekara ke pemadu berat diatu.

“Berindik enggau nya, kitai deka matak mayuh agi orang nyadi kaban pampang alai kita pechaya nengah chara tu ulih mantu ngeringka PKR,’ku iya.

Numpang mansutka jaku nya ba aum pengarang berita di Indu Opis PKR ditu, kemari.

AUM PEMBERITA…Numpang (tengah) bejaku ngagai pemberita di Kuching kemari.

PKR Stakan siti pampang baru ke ditumbuh kena 4 Oktober tu tadi.

Kelimpah ari nya, Umpang mega madah pampang Stakan deka bejalaika tanggungpengawa nyadung penerang ke bekaul enggau program perintah ngagai rayat.

Ku iya ke mega kaban ‘Majlis Pemimpin Negeri’, mayuh inisiatif udah dituku Perintah Besai PH meseti ditemu rayat sereta patut diasaika rayat.

Ba sentang kandang endur ke dikuasa DUN Stakan, Numpang madah isu baka ke jalai ti suah sekut ditengah perengka pengangkut meseti diputar enggau lengkas.

“Penusah besekut di jalai alun baka ke di Merdang enggau jalai Datuk Mohd Musa balat diasai peranak Stakan.

“Enti dibandingka pendiau jalai alun di Petra Jaya ke jauh manah, jalai di Stakan nadai ubah kenyau dpegai Barisan Nasional, udah nya Gabungan Parti Sarawak,”ku iya.

Nyaut tanya sentang chalun ti deka ngarika PH ba DUN Stakan ba pengawa bepilih negeri ti deka datai, Numpang madah pekara nya dilempaika ngagai ketuai renggat tinggi PH.

“Ba pengawa bepilih negeri ke udah, DUN Stakan diarika chalun ari DAP.

“Ke pemadu berat diatu iya nya kitai ngeringka PH lalu nentuka pemujur ba Stakan,”ku iya.