BAU: Pelilih Bau tebilang enggau pengawa ngali dulu kelia lalu diatu berubah nyadi sebagi ari palan dagang temuai ba menua tu.

Adun Layar, Gerald Rentap Jabu madahka pesaka asal ke bisi ba Pasar Siniawan patut dikemeran enggau diangkat nyadi palan dagang temuai.

Kenu ku Rentap, Perintah Sarawak nengah Opis Menteri Dagang Temuai, Main Asal enggau Seni deka nyukung pengawa ngatur Pengerami Muzik Cowboy Siniawan dudi hari.

Iya mega minta bala pengusung ti datai ngulu pengerami tu ngambi sama nyaga pemeresi ngelingi Pasar Siniawan maya hari nyadi pengerami nya.

“Nya alai, bala pengusung diperansang sama mai butul ai kediri empu ngambi kurang ngena changkir plastik.

“Kaunsil Pelilih Bau mega ulih nyendiaka tong uras maya pengerami nya ngambi sama nyaga pemeresi enggau ngena baru uras nya,” ku iya lebuh Pengawa Ngelanjar Pengerami Muzik Cowboy Siniawan ditu, Hari Minggu tu tadi.

Dulu ari nya Adun Serumbu, Miro Simuh madahka diri berasai lantang laban pengerami tu ulih diatur lalu udah datai ba taun keempat mujur diatur ba pelilih nya.

Ku Miro, aktiviti kepenudi kena Hari Enam tu tadi dirichah mensia mayuh ke datai ari serap umur laban sama bela rinduka muzik cowboy.

Berebak enggau nya ku iya, pengerami tu ngempuru enggau nyerakup rayat Sarawak pupu bansa enggau pengarap.

Miro madahka diri deka mai artis tebilang enggau artis muzik country ari Nashville ngambi merindang mensia mayuh maya pengerami ke deka datai.

Penerami malam nya mega diperindang raban kugiran menua tu iya nya Megaforce, Midnight Strangers, D.Y.Ren enggau At Adau.