DEBAK: Rumah sembiang kelebih agi ba Sarawak ulih nyadi penyerakup pupu bansa enggau pengarap.
Adun Saribas Mohammad Razi Sitam madahka rayat ba menua tu nadai ulah estrim taja bebida pengarap enggau gaya idup.

“Kitai ba Sarawak nadai penemu ti madahka orang pengarap Islam enda ulih tama ke gerija lalu orang pengarap Kristian enda ulih tama ngagai Masjid.

“Kebuah pia, semua pengarap dipegai kitai bela ngajar ngembuan kaul serakup enggau pangan diri ba dunya tu.

“Nya kebuah, kitai patut ngiarka diri ari terunda enggau ulah ke enda menuku nyema ulah ekstrim nguji tama ngagai menua kitai tu,” ku Razi nyemetak madah.

Iya mansutka jaku nya lebuh bejadi Pengawa Nyuaka Geran Perintah Sarawak ngagai Gerija Baptis Alleluyah Debak ditu.

Nya alai, iya ngarapka sebarang pengarap ba menua tu ulih sama ngetanka pengelantang enggau penyerakup dikembuan kitai ba Sarawak ngelama tu.

Berebak enggau nya, Razi udah nyuaka geran penyampau RM200,000 ti diberi Perintah Sarawak nengah Unit Pekara Pengarap Bukai (Unifor).

Kenu ku iya, Komiti Gerija Baptis Alleluyah dikearap ulih ngena manah geran tu lebuh ngatur aktiviti gerija baka ke udah diperambu sida.

Lebuh ngelansa pasal bantu nyeleti rumah panjai, Kaban Parlimen Betong Datuk Robert Lawson Chuat besetuju nambahka belanja dikena Projek Nyeleti Rumah Miskin Sarawak (PPRMS) ungkup semua 14 rumah panjai ba Dun Saribas.

Chairman Gerija Majing Nalang madahka bantu RM200,000 tu deka dikena nyeleti enggau ngemanah rumah sembiang ti udah manggai umur 25 taun nya.

“Kebendar kami deka minta agih belanja manggai setengah juta tang kami meri terima kasih ngagai Perintah Sarawak laban udah ngagihka belanja ngagai gerija tu,” ku Majing.

Nambahka nya, iya nyukung penemu Razi pasal rumah sembiang ulih nyerakup mensia mayuh kelebih agi ba menua kitai tu.

“Anang nangi datai ke gerija laban tu mega baka pengarap bukai endur mantaika penemu ti chukup manah taja bebida pengarap nyengkaum ulih ngenegap penyerakup pupu bansa enggau pengarap,” ku iya.

Sama datai Pemesai Menguasa Pelilih Mit Debak Nazari Bujang enggau Sapit Ketuai Pampang PBB Dun Saribas Stephen Lambor.