KUCHING: Pengari rayat kelebih agi ba kandang menua pesisir enggau menua ulu Sarawak bisi juluk besai lebuh Bajet 2020 dipejurai kena 11 Oktober tu.

Ku Kaban Kaunsil Nengeri (Adun) Balingian Abdul Yakub Arbi, nyadi siku pengari rayat ba kandang menua pesisir iya enggaika kandang menua pesisir enggau menua ulu enda dikeingat dalam bajet nya ila.

“Kandang menua pesisir enda mayuh tinggal ari pemansang ba selampur Sarawak.

“Nya kebuah, kandang menua pesisir patut dikemansang ngambi enda kelalu jauh takah pemansang iya taja enda sebela enggau kandang menua mengeri laban mayuh inisiatif diatu dipejalai nyengkaum ngaga jalai alun ngagai Lebuh Raya Pan-Borneo ti nyambung pasar enggau genturung pendiau ba menua tu,” ku iya madah ngagai pemberita.

Nangkan nya ku iya, entara pekara ti patut dipasuk dalam bajet tu nyengkaum nangkir enggau nambahka rentayan jalai alun ba kandang menua pesisir ungkup pemaik rayat ba dia.

Pekara tu deka ngasuh mayuh agi kerita betengahka jalai nya enggau nyambung mayuh agi pelilih mit kelimpah beratka pengelikun ba jalai alun.

“Inisiatif tu mega deka meri empas ngambi ngeranchakka agi ekonomi ba pelilih nya,” ku Adun Balingian.
Kedua, ngaga Palan Rawat dan Rehat (R& R) ba sepanjai jalai ngambi meri pengelantang naggai penguna jalai alun ti deka belela enda lama lebuh bejalai jauh.

Ketiga, nambahka mayuh industri moden ari produk berikan enggau betanam betupi baka nyiur, sagu enggau mulung ngambi ulih nyendiaka pengawa puang lalu pekebun ulih nyual asil sida seraya orang berikan ulih ngelakuka produk berikan sida.

Keempat, hotel enggau resort patut dikemansang sekalika nengah kerejasama enggau serikat peribit, konglomerat tauka gerempung kerejasama ba sekeda jalai tebing tasik dikena ngeranchakka agi industri dagang temuai kelimpah meri empas ekonomi enggau pengawa puang ngagai komuniti menua tu.

Nambahka nya, sitak tebing tasik endang suah endur raban ti kaya ngaga rumah mar rega nyengkaum ngaga banglo enggau kondominium ulih mega diperambu ngagai nambahka tubuh peranak ba sitak tebing tasik sereta numbuhka palan dagang enggau genturung pendiau ke baru.

Kelimpah ari nya, perintah mega patut ngemansang Palan Pemansik Utai Idup ba Tasik ungkup Pemansut dikena baru nyengkaum pansik ba Kampung Paya Bakau, karang, lamut batu tasik sereta pemansut tasik.

Nya alai ku Arbi, tu entara perambu ti ulih mantu piak opis menteri merampu pemansang enggau meri empas pemansang ekonomi ke manah agi ngagai peranak ba Sarawak.