KUCHING: Urung 758 iku mujur nerima gelar pangkat basa diri beserimbai enggau Hari Pengada Ke-83 Tuai Pemegai Menua (TYT) Tun Abdul Taib Mahmud di Miri, pagi tadi.

Sekretari Perintah Sarawak ti baru dichiri, Datuk Jaul Samion entara penerima gelar pangkat basa Datuk Amar Bintang Kenyalang ti mai gelar Datuk Amar.

Datuk Jaul mega sama nerima gelar nya begulai enggau Ahmad Tarmizi Sulaiman enggau Dominic Andrew @ Dagok Randan.

Menteri Kaunsil Kandang Menua enggau Pengawa Berumah, Sim Kui Hian mega entara penerima Panglima Negara Bintang Sarawak (P.N.B.S) ti mai gelar Datuk Seri lalu penerima bukai iya nya Gramong Juna enggau Mohamad Abu Bakar Marzuki.

Nangkan nya, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali mega diberi gelar Datuk begulai enggau Menteri Muda Betanam Betupi Dr. Abdul Rahman Ismail.

Bela nerima gelar Datuk iya nya Menteri Muda Dagang Entarabansa enggau Industri, Terminal enggau Pemansang Orang Dagang, Malcom Mussen Lamoh sereta enam penerima bukai.

Entara penerima Darjah Jasa Bakti Sarawak (D.J.B.S) ti mai gelar Datuk iya nya Bakrie Zaini, Chok Moi Soon, Antonio Kahti Galis, Zaidi Mahdi enggau Hamden Mohammad.

Pia mega, 10 penerima gelar pangkat basa Panglima Setia Bintang Sarawak (P.S.B.S) ti mai gelar Datuk tu nyengkaum Sapit Sekretari Besai Gempung Parti Sarawk (GPS) Ibrahim Baki enggau Ketuai Pemadah Parti Pesaka Bumiputera Bersatu (PBB), Idris Buang.

Penerima Johan Bintang Sarawak (Kepujian) tu semina siku aja iya nya Ho Swee Huat seraya enam penerima bukai Johan Bintang Sarawak tu nyengkaum Menteri Muda Pelajar , Sains enggau Pansik Teknologi Dr. Annuar Rapa’ee.

Pingat Johan Bintang Kenyalang (JBK) mega diterima 10 iku seraya dua agi penerima ‘Johan Perkhidmatan Cemerlang’ (JPC).