Dikena ngangkatka pemanah imej enggau nyungkat kualiti lagu Iban, pekit enggau anugerah mih pelasar ti pemadu badas. Nengah anugerah, komposer muzik, melodi, leka lagu, muzik video, grafik enggau pekara bukai dalam lagu naka ulih ngaga iya ti pemadu kreatif sereta manah.

Charta lagu hits enggau lagu tebilang ba charta ti diadaka ninting minggu meri peransang, peluang enggau inspirasyen ngagai semua anak seni ti ngemeranka aktiviti muzik enggau pengawa merindang.

Anugerah Charta Sapa Juara (ACSJ) iya ti keenam taun udah mujur nyungkak sereta ngangkatka nama enggau standard lagu Iban. Anugerah Carta Sapa Juara ke-6 deka diatur di Eastwood Valley Golf & Country Club di Miri kena 2hb November 2019.

Taja pia produser enggau komiti pengatur, semua finalis, pemuzik enggau tim teknikal dulu nyendiaka diri di Miri berengkah ari 29 hb Oktober 2019 tu ila.

Tu mih keterubah final ACSJ diatur di utara Sarawak laban sebedau tu iya semina diatur di Betong. Nitihka penerang ari Pengeluar Program tauka Produser ACSJ Ke-6 Monica Midi, anugerah tu ila disadang dipenyadi Menteri Komunikasi dan Multimedia Malaysia Gobind Singh Deo.

Produser ACSJ KE-6, Monica Midi

Pengawa nya deka berengkah pukul 6 lemai enggau pengawa bejalai atas karpet mirah raban 11 iku finalis sereta,”guest artistes” sereta enggau bala artis bukai ke bisi datai.

Raban finalis ACSJ KE-6

Bisi 11 iku finalis ti deka nyadi siti sejarah ACSJ di Miri nya Fredrick Sut (Anyut), Dominic Christy (Siti Sumpah Siti Janji), Taju Remaong (Jempuk), The Crew (Ayas Nuan), Joseph Dresa (Ganti Ti Menyana), Tony Rumpang (Jauh), D Crystal (Kemayang Nuan), Eyqa Saiful (Empeleman) NK Yongai (Indai), Alexander Peter (Tanggam Rat Ba Ati) enggau Isa Lee (Tubai Pengerindu).

Sida tu deka berebutka enam iti kategori iya nya Lumur Satu (juara), Lumur Dua, lumur tiga, Sada Nyawa Pemadu Manah, Leka Lagu Pemadu Manah enggau Lagu Pemadu Dikerinduka Peminat (nengah undi facebook).

Taun tu ACSJ tau dikumbai betuah laban mujur ngundang dua iku penanyi lama kitai Iban enggau champion ACSJ ke-5. Wilfred Vincent Ragam ke dulu suba tebilang enggau lagu ‘Sayau Aku Bisi Orang Ngempu’ enggau Josephine Jalin ke tebilang enggau lagu bepadu nyawa iya enggau Johnny Aman Beserara Enggau Ai Mata udah besemaya deka merindang mensia mayuh maya nya ila.

Penanyi lama… Wilfred Vincent Ragam

Taja jarang dipeda ayan ba panggau pemerindang baka penanyi baru, Josephine Jalin suah didinga ba radio enggau lagu baru iya ‘Nadai Rugi Enda Jadi Enggau Nuan’.

Wilfred Vincent Ragam ke meruan gerai sereta regas begulai enggau bala bakih iya nyadi Elvis Impersonator tauka penunda gaya Elvis Presley belagu.

Peminat Josephine Jalin enggau Wilfred Vincent Ragam endangelepaska peluang tu ila. Champion ACSJ ke-5 di Betong Karen Libau mega deka merindang mensia mayuh ke bisi datai ngagai Eastwood Valley Golf & Country Club.

Karen Libau ke tebilang enggau lagu Karam Ba Ati dijangka deka nyadaka lagu pop iya. Mensia mayuh kelebih agi sida ke diau di Miri anang enda sampal datai maya nya ila.

Sapa champion?

Nadai Rugi Enda Jadi Enggau Nuan… Josephine Jalin

Peminat lagu Iban ukai semina di Sarawak tang ba serata menua tu tentu bisi entelah enggau ulu lungga kediri empu ba sapa ke patut nyadi “juara”. Sebelas iku finalis mega tau dikumbai manuk sabung bala peminat enggau bala penyukung.

Taja pan pia, semua entelah enggau tanda tanya nya semina deka disaur ba malam pengujung program ACSJ nya ila. Nadai siku entara kitai ti nemu sapa ti deka bulih gelar champion ke serak tu.

Udah nya, lapan iku finalis solo enggau tiga finalis band bela bisi katan kediri empu. Kelimpah ari melodi lagu ti badas, sida mega bisi vokal, tusun muzik, leka lagu enggau aura kediri.

Populariti siku-siku artis ukai penentu sida gerinti menang maya nya ila. Ba ACSJ ke-5, artis popular enggau artis ‘senior’ tau mega alah lalu artis baru ti enda disadang nyadi pemenang; nya mih nasit enggau jereki.

Pekara menang enggau alah semina bepanggai ba jari akim enggau juri. Kebuah pia laban sida bisi chara enggau kriteria ti nyadi instrumen kena sida milih pemenang ba enam iti kategori ti dipekitka maya nya.

Tony Rumpang

Monica Midi madah anugerah ke sekali tu chukup mayuh pemar laban diatur ba palan ti jauh ari Kuching. Kelimpah berubah ari palan asal ti deka diatur, penanggul mega chukup berasai ari segi logistik. Taja pan pia ku iya, semua pemar enggau penguji nya ditapi enggau ati ti gaga sereta angkun.

ACSJ ukai semina endur kitai deka nemu sapa bagi pemenang enggau sapa ti alah. Iya endur kitai nanggam kaul enggau pemereti ati entara pangan diri.

Lebih agi ari nya ACSJ nya siti pelasar endur kitai ngangkatka nama enggau kualiti lagu Iban. Lagu kitai ngayanka chara idup tauka budaya kitai lalu ketegal nya kitai mesti ngaga lagu kitai enggau abis penyeremat orang ti meda enggau ninga lagu kitai dulu nyebut utai ti negatif ari utai ti badas.

Nya alai, sukung mih industri muzik kitai Iban laban sapa agi enti kitai empu enda. Aram mih kitai sama-sama begulai sejalai saum penemu awakka industri muzik kitai Iban terus ngerembai ti tau nyadi siti ari lubang penatai pemisi.

Belagu diatu ukai mina siti pengawa dikerindu tang udah nyadi siti jalai pengidup sebaka mega enggau pengawa ke bukai.

Baka nya mih peninggi enggau pengelaju penemu, pemendar pengawa kitai ti deka ngangkat sereta ngemansangka lagu Iban. Sekali tu semua finalis chukup betuah laban deka diberi siti set perfume ari Adriella Perfume.

Nambahka nya, Adriella Perfume mega deka nyendiaka trofi ngagai pemenang kategori Finalis Pemadu Dikerinduka Peminat enggau Kategori Leka Lagu Pemadu Manah.

Datai mih bebala mayuh ngagai Eastwood Valley Golf & Country Club Miri jam 6.00 lemai. Datai anang enda datai laban nya prluang betemu enggau finalis sereta enggau artis bukai ti dikerinduka kita.

Dominic Christy