KUCHING: Opis Bomba enggau Penyah Penusah Malaysia (JBPM) patut ngemanahka agi servis sida kelebih agi bekaul enggau pelin rumah sereta atur pejalai karan dalam sebuah rumah komuniti.

Ketuai Direktor JBPM Datuk Mohamad Hamdan Wahid madahka penusah angus ti nuntung rumah panjai ba menua tu majak nambah enti dibanding enggau taun ke udah.

“Taja mayuh program komuniti sereta kimpin dipejalaika JBPM, tang penusah nya majak nambah ari taun ke udah.
“Tu mandangka agi mayuh pekara ti patut digaga kitai dikena kitai ngemanahka agi servis ngagai komuniti,” ku iya.

Hamdan madah munyi nya ba pengawa bejadika program Ngenegapka Ketuai Zon enggau Balai Bomba di Palan Aum Penview (PCC) ditu, kemari.

Nangkan nya ku iya, nya udah nyadi siti ari fokus JBPM ba baruh Langgur Pemansang Malaysia Lumpar Ke-12 (RMK) nengah Polisi Bomba enggau Pengelikun.

“Komuniti nyadi orang ke pemadu beguna dalam meri timbal ngagai servis kitai.

“Nya kebuah kitai patut ngenegapka komuniti ngambika sida ulih mantu lalu meri timbal ti jampat ngagai penusah ngenyit ti nuntung sida,” ku iya.

Nya alai ku Hamdan, pekara nya enda ulih dikemujur enti nadai kerejasama ari Ketuai Zon enggau Ketuai Opis ba tiap pelilih menua ti dipegai sida.

Kelimpah ari nya, iya madahka Akademi Opis Bomba enggau Penyah Penusah (JBPM) Nengeri Sarawak disadang deka digaga ba baruh Langgur Malaysia Ke-20 (RMK20).

“Akademi tu disadang deka didirka ba bagi menua Kota Samarahan lalu kitai udah bisi tanah dikena kitai nirika akademi tu,” ku iya.

Rambau pengawa nya, bisi 70 iku raban pemesai JBPM ti nyengkaum raban Ketuai Zon enggau Opis Bomba ari Zon Borneo nyereta Program Ngenegapka Ketuai Zon enggau Balai Bomba Siri 2/2019 berengkah ari 14 ngagai 18 Oktober.

Tuju program tu dipejalai dikena meri licha bekaul enggau pemansang opis, pejalai opis sereta atur dikena raban bomba bejalaika pengawa sida.

Sama bisi datai ba program nya, Direktor JBPM Nengeri Sarawak PKPjB Khirudin Drahman @ Hussaini enggau Sapit Direktor JBPM Sarawak PgKB I Tiong Ling Hii.