SRI AMAN: Kuntau dikumbai kitai pengelandik nyaga pengelikun tubuh diri siti ari lanting ditampung ari aki ini bansa Iban dulu menya.

Ku Insol Harry, kuntau tu ke bendar asal ari leka jaku China tang pengelandik tu mega lama udah dikembuan Iban kenyau ari kelia.

“Jeman suba, kuntau tu pengelandik enggau penau ti enda tau enda dikembuan genap iku bansa Iban kelebih agi sida ke lelaki.

“Penemu kuntau tu mega siti ari chara dikena nyaga pengelikun enggau ngetanka diri empu maya kena kachau orang bukai tauka munsuh.

“Taja pia, seni ngetanka diri tu ukai dikena kitai mungkal nanjal orang dulu,” ku Insol ngelansa lebuh dirandau Suara Sarawak.

TEMEGAH… Insol enggau Lawrence begambar enggau Mandaw rambau pejalai nemuai ke Pontianak apin lama ke udah.

Nampung penemu sida ke tuai ku iya, kuntau tu ngemeratka gaya kebut gerenek ti jampat sereta sikar.

Maya belajar kuntau, orang nya bisi diajar nyilat tumbuk munsuh, numbuk, nendang sereta ngena senyata baka ilang, sangkuh enggau kayu tembung.

“Gaya bungai kuntau nya digerenek ngena lumai gulai langkah pencha enggau seni ajat bunuh.

“Nya mih kebuah, kuntau tu dikumbai siti ari seni nyaga pengelikun gembar tubuh diri ti nyelai, manah sereta alus dipeda enti dibanding enggau seni gembar tubuh ti bukai,” ku iya ke mega siku ari pemungkal Dayak Bukit Klingkang (DBK).

Nangkan nya ku Insol, kuntau suah dibantaika orang maya bisi pengerami besai kitai bansa baka Gawai Dayak enggau rami melah pinang.

NEGUHKA KAUL… Insol (dua kiba), Lawrence (kiba) diuluka Pemesai Dewan Adat Dayak (DAD) Kalbar, Pak Abet Nego (kanan) nemuai basa ngagai Sekretari Majelis Adat Nasional, Yokubus Kumis (dua kanan), ba rumah iya di Pontianak.

Sida ke mantaika bungai kuntau nya deka diserimbai enggau tabuh ti ngena pekakas baka tawak, bebendai, engkerumung enggau ketebung.

Rentak enggau tiun tabuh nya nyadika peransang orang ke bekuntau ngambika iya gagit enggau ransing agi ati ngerenekka bungai kuntau iya enggau naka pemanah-manah, ku Insol temegah nampung enggau ngemeranka seni nya.

Ku iya, Kuntau Iban diajar siku pengajar ti digela orang guro, tau dikumbai kitai baka ‘Sifu’ ti ngajar Kung Fu.

“Guro tu landik sereta ngembuan penemu mayuh macham bungai kuntau lalu iya deka ngajar bala nembiak ba menalan ti dikumbai kelang.

BASA… Insol disempulang Pak Abet (Panglima Saweng) enggau Pak Udin (Panglima Api) sereta bala kaban DBK bukai ngabas pendam Bujang Berani Linggir ‘Mali Lebu’ di Pendam Batu Anchau, Nanga Peka, Paku di Spaoh pegai Bagi Menua Betong.

“Kelang tu digaga ba dalam babas urung sepengangau penyauh ari rumah panjai tauka genturung pendiau.

“Kebuah pia laban maya belajar kuntau enda tau dipeda orang bukai ke ukai nembiak iya,” ku iya madah nyemetak.

Baka seni gembar tubuh ti bukai, kuntau Iban mega bisi atur disiplin kediri empu.

Genap tubuh nembiak guro nya enda tau enda dani tumu pagi lalu dipanjah ngena ai mayang pinang ti direndam dalam sebuah tajau.

LANTING… Insol begambar ba mua Tugu Peringatan Mandur di Pontianak, ti mantaika gambar peranak asal bansa Dayak ngelaban soldadu Jipun rambau Perang Dunya Ke-2.

“Udah nya sida diasuh mandi ai sungai lalu lebuh ke mandi, dia bala nembiak iya diasuh nyelam sebilah duku ti ditempalung ke dalam sungai iya.

“Udah siku ari sida nya tetemuka duku nya tadi, nya baru sida diasuh belanda ngagai kelang kuntau lalu berengkah belajar.

“Udah tujuh hari belajarka buah enggau bungai kuntau ba kelang nya, dia pengawa belajar nya pan tembu.

“Penembu pelajar kuntau dirami ngena adat gawai ti disebut tamat, reti nya udah tembu belajar.

“Ba pengerami tu, guro muka menalan dulu mantaika gerenek bungai kuntau iya.

“Semua orang ke meda bula enda tebelenga lilih magang. Sengian sekayu ruai. Sigi nengkelak begilik pala magang bala mensia mayuh meda pengelandik guro.

“Nya mih enti enda landik baka nya bedau tau nyadi guro kenu ku telai sekeda ke bisi meda.

“Udah tembu guro bekuntau baru idar siku-siku nembiak iya diasuh mantaika kuntau diri ke alai nembiak iya ke pemadu landik, sikar sereta lanchat bekuntau maya nya digelar guro nembiak numbur satu,” lansa Insol silik.

Ku iya, ba pengujung pengerami nya, nembiak kuntau deka besumpah ba mua guro sida iya, besemaya enda nyalah guna pengelandik kuntau ti udah dipelajarka sida nya.

Sida mega minta berekat ari Petara sereta Guro mega ngelalau sereta meransang nembiak iya ransing sereta puh agi belatih ngemanahka kuntau diri ngambika ulih nampung seni nya ngagai rebak dudi.

Nembiak rebak baru kemaya hari tu jarang bendar ngembuan pengerindu bekuntau lalu tebal agi sida nadai ati deka belajar kuntau.

“Taja pia, enda bangat kelalu laun enti semua bansa Iban ransing ati beserakup ngetanka main asal tu enggaika jemah ila tau punas.

“Kelimpah ari bisi dibantaika maya rami, kuntau tau bendar diangkatka nyadi siti ari pekit lumba enggau main ba menua tu.

“Nya alai aku meransang rebak baru anang enggai belajar sereta bisi pengangkunka seni ngetanka diri baka Kuntau tu.

“Tubuh deka regas, bepengerai sereta ulih nempa pemintar runding ari kitai ke belajar bekuntau kelimpah nambahka penemu enggau penau sentang pesaka tuai,” simpul Insol.