KUCHING: Unit Pansik enggau Pemansang Kaunsil Multimedia Sarawak (SMA) ngatur seminar Pansik Palan Penyulut (CoE) kena Hari Dua tu tadi.

Seminar nya digulu 70 penyereta datai ari opis menteri, ejensi, bakih teknologi, serikat menua tu enggau entarabansasa sereta lima palan pelajar tinggi menua tu ti nerima geran CoE ari SMA.

Batang tuju seminar tu deka ngerembaika penerang enggau ngiri penemu ngagai bala penyereta pasal projek pansik dipejalai palan pelajar tinggi di baruh geran SMA CoE.

Tuju bukai dikena meri kuasa ngagai bala nembiak Master Degree mantaika asil pansik sida kelimpah mantaika batang jurai ari Dr Sachin Gupta, Ketuai Pansik enggau Pemansang IBM ungkup dagang besai.

Menijar SMA, Dr Zaidi Razak madahka SMA pechayaka kerejasama entara palan pelajar tinggi, ejensi menua tu, bakih teknologi enggau bantu Unit Pansik enggau Pemansang SMA deka majak ngerumban asil utai dipansik ungkup dagang nya.

Di baruh Strategi Ekonomi Digital Sarawak 2018-2025 (Pansik enggau Pemansang: Pejalai Atur 36), Perintah Sarawak nengah SMA deka numbuhka CoE ngaul pengawa mansik enggau pansik translasyen dalam bidang besai ekonomi digital enggau sektor ekonomi bukai enggau kerejasama palan pelajar tinggi, industri, perintah enggau komuniti.

Ketuai Unit Pansik enggau Pemansang SMA, Dr. Khairul Hafiz madahka SMA bisi juluk deka meri kuasa ngagai pengempu geran CoE enggau nyendiaka pelasar ngambi ulih mantaika pansik sida ngagai pemansik enggau bakih teknologi bukai nengah program diatur ninting taun.

Ke diatu, bisi lima palan pelajar tinggi ti nerima geran iya nya Curtin University, UCTS, Universiti Malaysia Sarawak (Unimas), Swinburne University enggau Universiti Teknologi Mara (UiTM) sereta semilan sektor, 24 nembiak Master Degree bepenau nyengkaum 26 projek pansik dikaul dalam CoE.