PUNCAK BORNEO: Projek Nanam Baru Getah Gempuru ba Sitak Peroh/Rembang, Kampung Karu mujur dipenyadi pagi kemari.

Kaban Parlimen Puncak Borneo, Willie Mongin dipebasa bejadika projek ke diatur ba sebagi ari taba bala penyereta.

Nitih ku penerang, belanja projek tu udah diagihka Opis Menteri Orang Bumai enggau Industri Betanam Betupi Malaysia nengah Opis Betanam Betupi Nengeri Sarawak.

Sepenyampau 61 ruang bilik udah dikaul dalam projek tu enggau tanah 100 hektar pemesai.

Ku Willie, projek tu ukai semina ungkup nanam getah aja tang mega mai pangka besai numbuhka genturung pendiau baru ari pemisi sambung jalai ladang.

“Tu mega seriris enggau pengawa mantu raban bumai enggau pekebun mit ngemayuhka pemansut belanja sida sereta ulih nyungkak ekonomi raban diselinting nya.

“Perintah Besai udah ngagihka belanja besai dikena meransang program integrasyen utai tanam baka chabi, nanas, nyiur, semangka enggau buluh.

Pekara tu bisi disengkaum dalam Bajet 2020 ke dibantaika Menteri Wang Lim Guang Eng apin lama ke udah enggau penyampau RM150 juta ungkup industri nya,” terang iya.

Nambah nya ku iya, Perintah Besai mega deka ngagihka RM43 juta nuju pemansang Industri Betanam Betupi dikena ngemansangka benih ti bisi kualiti enggau mansutka asil ti tinggi.

Nya alai Willie keran amat meransang peranak menua tu kelebih agi sida ke diau ba Puncak Borneo ngerebut peluang ke bisi disediaka perintah dikena ngangkatka tikas pengidup sida nengah pengawa ti dikemeran sida ngelama tu.

Berebak enggau nya, Willie minta sebarang genturung pendiau ba Sitak Parlimen Puncak Borneo ti bisi ati numbuhka ladang gempuru tau datai ngelawa Palan Servis Rayat Parlimen Puncak Borneo.

“Ladang gempuru tu nyengkaum ungkup Nanam Getah, Kupi, Musang King, Nanas enggau Koko.

“Kitai pechaya komuniti renggat baruh deka bulih mayuh pemansang kelimpah ngandalka inisiatif tu ulih ngerumban pemansang menua pesisir.

“Sida mega tau nganjung peminta tauka mantaika sebarang tanya enggau penerang nengah email puncakborneo198@gmail.com,” ku iya madah nyemetak.