JULAU: Sekeda kubu didirika sebedau Perang Dunya Kedua di Pulau Borneo kelebih agi ba Sarawak agi teguh bediri dataika sehari tu.

Kubu Emma, 1859, di Sungai Kanowit, Kubu Brooke, 1935, di Nanga Meluan, Julau sereta Kubu Sylvia, 1880, di Batang Rajang, Kapit entara kubu udah didiri jeman perintah dipegai Koloni di Pulau Borneo.

Serak tu Suara Sarawak nguji mai kitai nyidi sekeda bekau kenang, reti enggau guna Kubu Brooke laban jerita kubu tu jarang endar didinga tauka dikunsi.

Kubu Brooke digaga lebuh menua dipegai Rajah Brooke di Nanga Meluan dalam taun 1935 lalu tembu 1938 lalu gaya langkar enggau pemesai nyauka baka kubu bukai di Sarawak.

Nampung kenang sida ke tuai, kubu tu digaga pengudah pemidang Rajah Sarawak keterubah, James Brooke, ti megai Borneo pengelama 22 taun, ari taun 1841 ngagai 1863.

 

“Pengudah pinchin gawa dalam taun 1963, James Brooke udah nyiri anak menyadi iya, Charles Anthoni Johnson Brooke lalu ditampung anak iya, Charles Vyner Brooke.

Rajah Charles bekenaka kubu tu endur nganjung raban polis gawa nyaga enggau nyamin pengelikun sebarang pengawa dipejalai kelebih agi ari kerubah Asun enggau bala iya ari Sungai Kanowit.

Perintah dipegai Brooke sebilik di Sarawak iya nya siti jeman pegari pengelama 100 tahun (1841-1941) dataika soldadu penyelawai Jipun datai nyerang Malaya enggau Pulau Borneo.

Jeman perintah dipegai Brooke sebilik di Sarawak chukup teguh taja mayuh dikenggai peranak asal menua nya kelebih agi raban bansa Dayak Iban.

Kubu Brooke didiri lebuh dipegai Rajah Sarawak ketiga, urung 45 kilometer ari Pasar Julau, 50 minit pejalai nengah jalai darat tauka nyauka 3 jam nengah jalai ai.

ENTAP… Langkar begunan Kubu Brooke agi bediri teguh nyentuk diatu.

Ba kandang ngelingi kubu tu, bisi genturung pendiau peranak tebal agi datai ari bansa Iban lalu pekara tu nyadi laban jarang endar bansa bukai ngentak berumah dia.

Besepiak kubu nya mega bisi sebuah sekula dikumbai Sekula Primari (SK) Nanga Meluan lalu kubu tu diberi nama ngingatka kuasa perintah Brooke sebilik di Sarawak nyauka manggai 100 taun.

Kubu tu mega ngingatka peranak dia pasal perintah dipejalaika sida ti dipadu gawa James Brooke ti ngelaban sereta muntanka serang sekeda bujang berani Iban baka Rentap (Libau), Panglima Ason sereta Panglima Balang.

Pengudah Sarawak diserah ngagai British ngelaika pengujung jeman pegai Brooke dataika menua megai perintah diri empu kena 22 Julai 1963.

Dulu suba, Kubu Brooke tu nyadi opis ngatur pengawa baka Opis Pelilih Mit Julau enggau Opis Polis tang diatu nyadika malin enggau palan dagang temuai ba pelilih menua nya.

JALAI AI… Sungai Meluan ba mua Kubu Brooke agi nyadi jalai penyambung peranak menua ulu sungai di Pelilih Julau.

Rambau jeman Perintah Brooke, kubu tu bisi mayuh guna lalu pemadu nyenggala nyadi opis besai piak British, dikena matau penatai munsuh ti nengah Sungai Kanowit enggau Sungai Meluan.

Kubu tu strategik laban besemak enggau kededua sungai nya lalu muntang endur sida matau pengawa enggau pemindah peranak menua nya sereta ulih ngerembaika kuasa megai rayat renggat baruh dia.

Kelimpah nyadi opis besai ngatur pengawa, kubu tu mega kala nyadi palan pelajar pengudah indu opis dipindah besemak enggau Pasar Julau.

Pekara narit ati kitai iya nya palan pelajar tu nerima penatai mensia mayuh ti rindu sereta angkunka pengawa ngiri penemu ti nadai ngira umur enggau status sida.

Diangkat nyadi palan pelajar di sitak Meluan enggau kandang menua Entabai agi ditampung kandang beberapa taun udah nya dataika sebuah sekula primari ditumbuh besepiak kubu nya ngujungka iya ditutup.

Kubu Brooke mega kala diangkat nyadi kort lalu pekara tu ulih dipeda ari langkar begunan ke bisi ba ringkat atas nyadi kandang becharaka kes besai sereta berat ti disikap enggau mija akim sereta sapat ti nyadi endur piak dituduh dipechara.

Siti ari utai ngasuh alit ati iya nya nyauka semua langkar ari geladak atas, dinding, tiang, kasau dataika tulang perabung kubu tu endang digaga ari kayu tebelian.

Nitihka jerita, ramu kayu tebelian tu ari pemeri peranak dia, disayat lalu dibai niki ngagai tanah bebukit ba tebing Sungai Meluan. Kayu tebelian tu mega kebal ari leka seterum. Genap sukut kubu tu endang digaga ari kayu tebelian tulin lalu semina geladak ringkat baruh aja digaga ari semin.

Struktur langkar ke bisi ba kubu tu mega chukup nyelai lalu bisi pengelebih ba guna iya empu ke alai genap dinding ringkat atas ngembuan sekeda lubang mit ti dikena manggaika munchung senapang sereta ngelilakka munsuh.

Ba pekara tu, kitai setuju laban lubang beketeling ke bisi ba dinding Kubu Brooke endang dikena manggaika munchung senapang, ngipa penatai bala munsuh kia.

Pia mega bisi enam buah tangga enggau sebuah pintu besai endur tama ke dalam kubu tu teguh amat endang digaga ari kah kayu tebelian.

Pemadu nyelai iya nya kubu tu bisi rumah pasung iya empu ti dikena ngejil penyelawai ditangkap sereta bisi sebuah balai mit endur ngintu diri tauka belelak.

Mua empelua tauka jenila ke bisi ba kubu tu mega digaga tinggi ari rumah bukai sereta tebal amat ngambika leka seterum enda ulih bumbus nentuka pengelikun sida ke gawa dia suba ari serang munsuh. Semua tu ngasuh Kubu Brooke agi bediri teguh, tegap enggau entap sereta chukup likun dataika sehari tu baka ke dipeda kitai.

Beratika pemesai reti enggau guna kubu tu, Perintah Sarawak udah bejalaika insiatif ngintu enggau nyaga nengah Atur Pemansang Malaysia Lumpar Ke-11 (RMK-11) di baruh Projek Ngintu Enggau Nyeleti Kubu Ngundan Sejarah di Sarawak – Kubu Brooke udah dikemendar.

Nengah inisiatif tu, tanggungpengawa dilempai ngagai Opis Muzium Sarawak ngatur pengawa ngaul adat lama ba sesebuah kubu sebedau projek dipejalai.

Pekara tu beguna amat dikena kitai bebasaka adat enggau pengarap dikemeran peranak menua nya kelebih agi di menua Julau empu.

Pengawa miring dipejalai mega dikena minta berekat, ngampun enggau masa Petara aki ini nyengkaum minta pengawa likun sereta lanchar, nadai penekul.

Adat Miring tu mega kala dipejalai ba Kubu Margherita, Kubu Emma, Kubu Alice enggau Begunan Lama Muzium Sarawak diuluka raban bansa Iban.

Kubu Brooke endang bisi turai jerita enggau kenang pait manis iya empu lalu mayuh pengelebih enggau penyelai ti matak penatai bala temuai ari menua tu empu enggau menua luar.

Nya alai, semua piak patut besaup enggau meri kerejasama ba pengawa ngintu enggau nyaga taba pesaka asal menua tu ngambika semampai bisi dipeda uchu ichit kitai jemah.

Anang sesekali kitai enda ingatka pemesai jasa bala ketuai menya laban penatai sida mai empas chukup besai ngagai kitai bansa nyengkaum atur ti ngempung kitai ulih diau bebaik lalu badu bekayauka pangan diri diatu.

Kebuah pia laban rebak baru deka ampit meda bekau ditinggalka Rajah Brooke ti beberita tebilang nama ba Pulau Borneo tu.