KUCHING: Sapit kepala Menteri Tan Sri Dr James Jemut Masing nangkan rayat Sarawak anang alah penemu ari orang luar.

Nya kebuah iya mejah penemu bala menteri ari Malaya baka deka ngeruga autonomi imigresyen menua tu laban meri empas enda manah ngagai hak bansa asal menua tu.

“Ambika chunto, penemu Menteri Kaunsil Kandang Menua enggau Pengawa Berumah, Zuraida Kamaruddin, ti madahka sida nadai belampung ati ngubah autonomi imigresyen kitai ba Parlimen.

“Enti pekara tu diubah, orang Malaya enda ibuh begunaka passport sereta nadai tatak tama ngagai menua tu,” ku iya.

Masing madah, enti kitai alah lalu GPS lenyau penuduk Dun Sarawak, reti iya kitai nyerah kuasa ngagai Malaya.

“Enti pekara nya nyadi, kitai deka lenyau semua utai dikemisi nyengkaum pengeraja menua tu,” ku iya madah nyemetak.

Masing mega ngingatka parti ngambi meruan lurus ati seraya madahka Pengawa Bepilih Besai Ke-14 (PRU 14) nyin tadi nyadika teladan ngagai kitai.

“Aku ngarap bala bakih aku ba GPS enda ngereja pengilap ti sama taun 2021. Kitai enda rebah enti begempung nyadi siti tim,” ku iya.

Iya mansutka jaku tu lebuh bejadika Pengerami Makai Lemai Nyerumba Makai Taun Parti Rakyat Sarawak (PRS) Ke-15, ba sebengkah pak makai tebilang ditu, malam kemari.