Belanja 2020 Sarawak

“Pekara ke nyata ila belanja tu jauh manah ari Belanja 2020 Perintah Besai ti diberi ngagai Sarawak. Sida semina meri RM4.4 bilion aja, jauh pak awi… ni chukup.” – Abang Johari.

SIMANGGANG: Kepala Menteri Datuk Patinggi Abang Johari Tun Openg meri jamin Belanja 2020 Sarawak ti deka dibantai 4 November tu, manah agi ari Belanja 2020 Perintah Besai.

Taja pia ku Abang Johari, iya enda deka mantaika pekara nya diatu jam ke diatu.

“Anti 4 November ila, aku deka mantaika Belanja 2020 Sarawak ke alai kitai ngena belanja baru ungkup pemansang infrastruktur.

“Tang enda ulih dipadah kelalu tumu lalu bela nganti mih kitai.

“Pekara ke nyata ila belanja tu jauh manah ari Belanja 2020 Perintah Besai ti diberi ngagai Sarawak. Sida semina meri RM4.4 bilion aja, jauh pak awi… ni chukup.

“Belanja tu ila dikena kitai ngatur semua pemansang selampur Sarawak lalu aku pechaya ari perambu timpuh panjai, kitai deka berubah nyadi manah moden,” ku iya lebuh bejadika Pengerami Benak ba tebing Batang Lupar kemari.