KUCHING: Pengelantang orang lunggar umur deka diintu meruan nengah inisiatif Kenyalang Gold Card (KGC) pengudah perambu tu dikemendar ba kabinet ujung taun tu.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka empas ari penyampau tubuh sida ke tuai majak nambah ke alai perintah merambu deka mantu sida ba pekara servis enggau utai diguna.

“Bantu tu dikumbai kami Kenyalang Gold Card (KGC) ti deka nyendia mayuh bansa servis enggau utai diguna lebuh umur udah lunggar baka diskaun bayar bil ba klinik tauka sepital, diskaun tikit bilun, insuran, diskaun meli utai dikena sida enggau mayuh agi.

“KGC tu diperambu ngambika ulih meri pemaik ba pengidup raban diselinting, diau kantang sereta diintu meruan maya sakit dataika sida midang,” terang.

Fatimah bejaku munyi nya ba aum pemberita beserimbai enggau Aum Kaunsil Orang Indu enggau Ruang Bilik ba sebuah hotel tebilang ditu tadi.