Adat Buroma: Miring minta ading Petara

KUCHING: Pengawa miring bebala mayuh ba pengerami Gawai Serumpo Tembawai Tampun Juah, Desa Segumon, Kecamatan Kembayan, Kabupaten Sanggau udah diatur kena 3 enggau 4 September tu tadi.

Kenu ku siku ari pengabang ke bisi ngulu gawai nya, John Adam Gilbert, penatai bala mayuh ari raban bansa Dayak ngagai pengawa miring nya kena Hari Dua, 3 September, sebengkah ari rintai pengawa lebuh Gawai Serumpun Tampun Juah 2019.

“Lebih kurang 500 iku ke bisi datai enggau ngulu pengawa nya ti diarika raban ari gerempung tauka serakup ti udah dikangau, ditesau nyadi pengabang.

“Bala kami ke ngabang tu datai ari raban Perwakilan Pemuda Sanggau enggau bala raban ari tiga bansa NGO Dayak Iban ti datai ari Sarawak sereta bala raban ari Perwakilan Pimpinan Lembaga Anggota Konsorsium Gerakan Pemberdayaan Pancur Kasih (GPPK) Kalimantan Barat,” ku John lebuh dirandau Suara Sarawak.

Ku iya, nyadi tuju miring ti nyadika Adat Buroma Gawai Serumpo Tampun Juah taun tu dikena minta ngagai petara ngambika kitai diau likun, gerai, nyamai, chelap, embab ke semua raban bansa ke bisi datai ngagai Tembawai Tampun Juah ti datai ari Indonesia enggau Sarawak.

NYIDI PENATAI… John Adam Gilbert

“Tuju bukai besampi ngambika kitai bansa Dayak berani ngemansang kediri maju lebih agi ari ke udah lalu besampika semua pengawa dikereja kitai bansa Dayak deka mujur magang jemah.

“Pia mega semua utai tanam tau mansutka asil ti meri penguntung kelimpah minta bansa Dayak gerai nyamai ari sebarang rampit penyakit.

“Baka nya mega ngarapka semua bansa jelu tupi kitai bansa Dayak beranak telesak lalu nadai kena rampit sebarang penyakit ti mai pengerusak sereta besampika semua temuda rimba enggau batang sungai likun ari kena keruga semua macham pengerusak,” ku iya ngelansa sekeda sampi lebuhka miring bebala mayuh.

Nangkan nya ku John, pengawa miring Nanam Pentik ti dikereja kitai bansa Dayak Iban ari Sarawak ba Tembawai Tampun Juah tu mega udah mujur diatur ba hari ke sama.

Pengawa tu dikereja ketegal kitai ti ngaku diri bansa Dayak Iban endang turun temurun asal datai ari Tembawai Tampun Juah ti betuaika Dato Sri Edmund Langgu Anak Saga.

DIPEBASA… Dato Sri Edmund Langgu diangkat bejaku ba mua bala mayuh ke bisi enggau miring.

“Miring ngena Adat Buroma sehari nya mega bisi dikereja bala raban bansa Dayak Bi Somu kena sida meri terima kasih ngagai endur keramat nya sereta besampi minta bulih berekat ti betuaika lemambang sida ke dikumbai Tuboreh benama Pak Dur beumur 75 taun asal ari Desa Semongan, Kecamatan Noyan, Kabupaten Sanggau.

“Nama reti miring nanam pentik ti dikumbai sida Mpago Luwe Ma Basua enggau Dayang Romia.

“Nyadi miring Mpago tu dikereja bansa raban Dayak Bi Somu kena Hari Tiga, 4 September ba tengah laman Rumah Adat Dayak Tampun Juah betuaika Temenggung Dayak Bi Somu benama Bapak Lomon ari Desa Semongan, Kecamatan Noyan, Kabupaten Sanggau.

“Pentik Mpago ke ditanam sida nya nandaka gaya tuai siku bansa Dayak Bi Somu ke benama Luwe Ma Basua lalu enggau siku tuai indu benama Dayang Romia nitihka tusui Temenggung Bi Somu Bapak Lomon, ke alai pengawa miring Mpago tu kena masa pentik dua iku nya,” ku iya nerang silik.

Bisi mega siti pengawa ke dikumbai Bekana Bejaneh Mengawali, iya nya lemambang nimangka pengawa Begawai Ngumpan Sandung Kenyalang, ti dikumbai kitai Dayak Iban Sarawak Begawai Nimang Enggau Ngumpan Sandung Kenyalang.

Nyadi pengawa tu ku iya dikereja bala bansa Dayak Iban Sebaruk ba tengah laman Rumah Adat Dayak Tampun Juah ba Desa Segumon, Kecamatan Sekayam, Kabupaten Sanggau berengkah ari pukul 12 tengah malam kena Hari Dua 3 September nyentuk Hari Tiga 4 September, beserimbai enggau pengawa Gawai Serumpo Tampun Juah 2019.

KELAI… Tiang Sandung didiri ba tengah laman Rumah Adat Tampun Juah.

“Nyadi lemambang ke nimang malam nya, iya nya betuaika Apai Jawin, 73 taun, Apai Jutem, 72 taun, enggau Apai Jukit, 72 taun, ti penatai asal ari menua Sungai Sepan.

“Leka timang sida bekenangka gaya pemindah pendiau orang ti nguan Tembawai Tampun Juah nya kelia ti ngujungka tepantup dikereja ba tujuh iti tiang sandung ba tengah laman Rumah Adat Tampun Juah.

“Pengawa nimang tembu sepengudah sida ti ngumpan Kenyalang ba puchuk tujoh iti tiang sanding lalu ujung pengawa ditembuka sida enggau pengawa ti dikumbai Nyepan.

“Nyadi Nyepan tu pengawa orang ti ngirup ai tuak ke disimpan sida dalam siti tajau besai ba pun tiang pemun, tiang sandung ke dipegawai nya.

“Sida ngirup tuak nya ngena mangkuk jalong, dikena bungah enggau pangan diri,” ku iya nikalka kenang diri lebuh ngabang kin.

BUNGAH… Sida ke lelaki diberi ngirup tuak ngena mangkuk jalong, dikumbai Nyepan.

Nama reti pentik tauka ba jaku bansa Dayak Bidayuh Sisang dikumbai sida Pedagi. Pentik tu dikumbai sida benama Pedagi Lolang enggau Daranante.

Reti Pedagi ba jaku bansa Dayak Bidayuh Sisang ba Desa Segumon, Lubuk Sabuk, Kecamatan Sekayam, Kabupaten Sanggau ke ka ditanam begulai enggau tiang sandung ti ke tujuh ba tengah laman Rumah Adat Tampun Juah kena Hari Tiga, 4 September.

“Pentik tauka Pedagi ke ditanam nya dikumbai pedagi dua iku melaki bini tuai bansa Bidayuh Sisang ke dikumbai sida iya ke lelaki benama Lolang lalu iya ke indu nya benama Daranante.

“Pengawa tu dikereja ngena chara miringka pentik nya nitih ke tusui Temenggung bansa Sisang ke benana Bapak Hata,” lansa iya silik agi.

Mayuh amat kenang manis seraya nyidi penatai asal peturun kitai Dayak Iban ari menua ke dikumbai Tembawai Tampun Juah, ulih bekelala enggau meda empu daya idup enggau adat lama dikemeran sida din.

Nya alai John meransang kitai bansa Dayak Iban menua tu anang enggai bejalai matau menua seraya belematika lanting ditinggalka peturun kitai menya.

 

KELAI BASA… Temenggung Dayak Bi Somu nyapi pentik sida makai.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak