Pemansang tanah tinggi dirumban

MIRI: Perintah Sarawak ngagihka RM1.5 bilion ngagai Kaunsil Pemansang Tanah Tinggi (HDA) dikena ngerumban projek pemansang infrastruktur ba kandang menua nya.

Sapit Kepala Menteri Datuk Amar Douglas Uggah Embas madah, pemansang deka ulih dirumban ari pemisi sambung jalai alun ti meruan enggau perengka guna bukai ba kandang tanah tinggi.

“Perintah Sarawak merambu berimbaka mayuh agi tanah ungkup pengawa betanam betupi ti tau mansutka mayuh agi asil belanja.

“Naka diatu, kami udah ngagihka RM345.9 juta ungkup empat projek jalai alun enggau sebuah jematan lalu melanja RM20 juta ungkup projek bekal ai ngagai Long Silat enggau Long Jekitan,” ku iya.

Uggah mansutka jaku tu rambau Program Randau Beserimbai Enggau Pengerami Pemesai Begulai Enggau Rayat ba Kampung Long Jeeh, Baram ditu tadi.

Berebak enggau nya, Uggah ngemendar geran RM20,000 ungkup JKKK Rumah Panjai Jeeh sereta meri paung rian Musang King ngagai bala ketuai raban bansa ba kandang menua nya.

Sama datai Adun Mulu ke mega Sapit Speaker Kaunsil Nengeri (Dun) Datuk Gerawat Gala.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak