KUCHING: Unit Khas Meresa Penumpang Opis Kastam Diraja Malaysia (JKDM) ba Padang Bilun Entarabansa Kuching (LTAK) mujur ngemuntanka dua kali pengawa nguji mai dadah ke Sarawak nengah penerebai dalam menua (domestik).

Direktor JKDM Nengeri, Datuk Sharifah Halimah Tuanku Taha madah, orang ditangkap tu iya nya siku indu enggau siku lelaki pengudah diperesa silik seduai uya mai dadah ari Pulau Pinang.

“Asil diperesa ba beg besai indu ke beumur urung 20 taun nya urung pukul 8.55 pagi Hari Tiga tu tadi dia tetemuka lima kambut ngundan igi kristal dipelaba dadah bansa methamphetamine.

“Semua kambut ke dibalut enggau keretas karbon nya nguji ngerapaska peda bala pemesai penerit adat,” ku iya nengah sebengkah penerang, kemari.

Kenu ku Halimah, penyampau dadah ke dirampas nya berat 5,049 gram lalu dipelabaka berega RM252,540.

“Kes kedua mungkur siku lelaki peranak menua ke beumur 40 taun maya sangkai ba LTAK pukul 9 pagi ba hari ke sama (Hari Tiga).

“Pengudah diperesa silik dia ditemu bisi lima kambut plastik ngundan igi kristal dadah methamphetamine dibalut enggau karbon dikena nyaruka perati raban penerit adat,” ku iya.

Ku tandu penerang nya, penyampau dadah dalam plastik nya bisi 5,069 gram sereta dipelaba berega RM253,450.

Kenu ku iya, kededua saspek diatu diriman ketegal penyalah lalu dipansik nitihka Seksyen 39B Akta Dadah Berbahaya 1952, enti dikenuku salah ulih diukum mati.

Berebak enggau nya, Halimah madah penyampau rega dadah ke dirampas JKDM Sarawak nya naka tu dipelabaka RM2.3 juta.