KAPIT: Pengawa nyadung ai udah mujur dipejalai raban Opis Bekal Menua Pesisir Kapit (JBALB) berengkah hari ensanus.

Pengawa tu dipejalai beduduk ari bekal ai beresi tejanggal ketegal raban kunteriktur benung ngemanahka dua bengkah tangki ba loji tu.

Penanggul nadai ai udah nyadi bepun ari 28 Oktober nyentuk ke 10 November tu ila.

Pengawa nyadung ai udah dipejalai ba genturung pendiau baka sitak Country Height, Sunny Height, Pelajau, Selirik enggau palan ti tinggi.

Nangkan ke nya, ba kandang dua hari ke udah bekal ai iya nya kemari enggau sehari tu bisi dibuka baka selama sereta deka ditutup baru kena 1 November.

Taja baka nya, sekeda palan agi mengkang nadai bekal ai beresi nyentukka sehari tu taja udah dipadah deka diberi bekal ai beresi sepengelama dua hari berengkah kemari.

NYADUNG AI…Lori mai bekal ai ari Opis Bekal Ai Menua Pesisir Kapit (JBALB).