BETONG: Siti kaunsil ti ngembuan pengelandik ba Ngepan Iban patut ditumbuhka dikena nyaga sereta ngintu penulin identiti ngepan bansa Iban nya.

Sapit Kepala Menteri Datuk Amar Douglas Uggah madah, bisi isu nyadi alai ngepan Iban sepeneka ati ngena sereta enda berurun dipasuk.

“Kitai enda tentu lantang ati lebuh bisi meda sekeda model indu bekenaka sirat maya sida mandangka ngepan nya ba menua bukai.

“Sirat endang ukai dikena sida ke indu tang ngepan sida ke lelaki.

“Nya alai, kitai patut numbuhka siti kaunsil ngemataka pekara tu ngambika orang luar enda saru penemu sentang ngepan Iban,” pia ku iya madah maya bejadi pengerami nutup simposium Ngepan Iban ikas nengeri ditu, malam ensana.

Simposium dua hari nya diatur nengah kerejasama Yayasan Kebudayaan Dayak, Yayasan Tun Jugah, Opis Residen Betong enggau Kelab Ngepan Iban ti betuaika Kaban Kunsil Nengeri (Adun) Betong Gerald Rentap Jabu.

Uggah madah, opis nya ila deka meri jaku pemutus bekaul enggau penulin ngepan Iban ngambika pekara nya enda majak nyadi.

“Kitai meseti ngintu sereta nyaga penulin ngepan Iban laban nya identiti enggau nyadi pengeraja bansa kitai,” ku iya madah baru.

Uggah mega madah, perintah nengeri endang ngemeratka pekara ti bekaul enggau ngepan sereta semua ngepan etnik di nengeri tu.

“Kepala Menteri kitai mega endang ransing deka meda semua ngepan etnik ditu dijaga, dikemansang ngambika rebak dudi semampai temegahka ngepan diri.

“Ari ngepan, begulai enggau pupu bansa nyadika pengering pengelantang enggau penyerakup kitai di Sarawak nyentukka diatu.

“Semua pengelebih ti dikembuan kitai tu ngasuh kitai jauh manah dipeda orang menua bukai,” pia ku iya madah.

Bekaul enggau pekara bekaul, Uggah madahka iya deka berandau enggau Kepala Menteri sentang pengawa nyendiaka siti endur alai mandangka pesaka lama Iban di Fort Lily (Betong), Fort Alice (Simanggang), Fort Emma (Kanowit) enggau Fort Sylvia (Kapit).

“Semua tu deka diaduka kitai ngambika rebak baru semampai meruan meda sereta enda suntuk penemu enggau pengeraja asal bansa diri,” pia ku iya.

Sama bela datai maya tu iya nya Menteri Muda Opis Menteri Perintah Menua Datuk Penguang Mangil, Kaban Parlimen Betong Datuk Robert Lawson Chuat, Chairman Yayasan Tun Jugah Tan Sri Leonard Linggi Tun Jugah, ex-Kaban Parlimen Saratok ti mega Raban Pengelandik Main Asal Iban Datuk Sri Edmund Langgu, Sekretari politik Kepala Menteri Dr Richard Rapu, Ketuai Raban Indu PRS Datuk Sri Sophia Brodie sereta sida ke bukai.