SARIKEI: Peneguh tanggam kaul serakup ulih diterenak nengah program begempuru begulai enggau pangan diri maya lepa ujung minggu tauka kemisi.

Serakup Dayak Sarawak (Pedas) Sarikei ngena awak ujung minggu sida ngatur aktiviti ti mai bala kaban begelumu sereta makai serumpu serayaka muka randau enggau bekunsika sekeda penemu sereta penerang bekaul.

Ku Ketuai Pemadah, Aldrich Cliffranc, mayuh pemaik diulih ari program baka nya laban kitai bechuanka pengawa sida ke tuai ti ngempung nembiak redak ngena chara nya ngelama tu.

“Kitai nali sereta nunda pengawa ti meri pengelantang kelebih agi ba kaul begulai laban tebal agi bala kitai kiruh ngatur pengawa, bekuli maya hari bukai.

“Nya alai awak ujung minggu baka tu manah endar dilimpang ungkup pengawa ti nerenak pemaik enggau pengelantang.

SIRU… Bala kaban Pedas Sarikei ngena awak ujung minggu ngusung pangan diri.

“Enti kitai berati, dulu suba sida aki ini nadai kala ngelaungka pangan diri lebuh bisi pengawa baka beduruk, makai serumpu enggau begelumu sebelah ruai kelai siruka pangan diri,” ku Aldrich.

Nya alai ku iya, endang patut pengawa ke manah baka tu ditampung ngambika rebak baru nemu sereta meretika pemesai guna enggau pemanah ulah ngagai kaul serakup kitai.

Aldrich mansutka jaku tu lebuh ngulu pengerami ngintu hari pengada anak siku ari kaban serakup nya benama Larrysa Hillary kena ujung minggu tu tadi di Batu 12, Julau ditu.

Sebedau tu mega Pedas Sarikei udah ngatur Hari Diri Sebilik enggau tuju ke sama dibai ati siru begulai enggau pangan diri seraya nanggam teguh agi kaul entara sida, ku iya.

“Kami semampai ngiga awak ngambi ulih begempuru enggau bala kaban dalam serakup tu nyengkaum sida sebilik ngambi bisi diteladan rebak baru.

SAMPI BULIH IDUP MENYANA… Endu Larrysa (tengah) gagit nyepu dian kek lebuh ngintu pengada iya ujung minggu tu tadi.

“Ambika chunto rambau Hari Ruang Bilik Pedas Sarikei tu tadi, kami nikal kenang dikumbai kitai Iban ngarang ikan ba pegung lalu pengawa tu jarang endar dikereja diatu.

“Rindu amat ati meda bala nyau rindang diri nyagam ikan pengudah ai pegung dililih ngambi nyamai endur ngarang,” ku iya ngelansa.

Kelimpah ari nya ku iya, awak baka tu mega kena kami ngelanggur sebarang aktiviti bukai baka Pekit Karaoke ti udah diatur empai lama dikena ngiga belanja lalu mayuh program bukai udah dilanggur.

“Ari randau ngelansa, penemu enggau penerang ke dikunsi, semua tu endang pulaika pemaik serakup lalu ukai penguntung ngagai orang siku-siku,” ku iya madah nyemetak.

Berebak enggau nya, Aldrich ngarika bala kaban bukai meri jaku puji enggau besampika endu Larrysa teulihka pemujur enggau nyapai juluk ati iya ba semua pengawa dikereja.

Aldrich mega meransang rebak baru nyadi kaban Pedas nadai milih pampang ngambi ulih besaup gawa ngintu pengelantang sereta negika hak raban bansa Dayak ba menua tu.