KUCHING: Pengawa ngaga Jalai Besai Pan Borneo dikearap ulih dirumban laban gaya jalai nya diatu balat rusak sereta enda likun.

Adun Tamin Ir Christopher Gira Sambang madah, jalai ke balat rusak diatu sepanjai jalai Sibu, Selangau, Arip enggau Bintulu ti tau ngeruga pengelikun mensia mayuh.

“Kitai andal amat pengawa ngaga jalai ulih digaga enggau lengkas berundingka pengelikun enggau pengelantang sida ti betengahka jalai nya.

“Kebuah pia laban suah endar penusah bebadi nyadi nyengkaum kes ti nabanka nyawa,” ku iya.

Gira mansutka jaku tu lebuh ngambi bagi bejuraika Rang Undang-Undang Perbekalan (2020) enggau mosyen Resolusyen Angar Pemansang Belanja 2020 maya Aum Kedua Renggat Keempat Dun Ke-18 ditu, tadi.