KUCHING: Pengari rayat menua pesisir diansak meransang anak ba menua ulu belajar bebendar ngulihka penyulut dalam Ujian Penilaian Sekolah Rendah (UPSR) ngambika sida ulih belajar ba sekula entarabansa.

Menteri Muda Pelajar, Sains enggau Pansik Teknologi, Dr. Annuar Rapaee madahka Perintah Sarawak merambu ngaga lima sekula entarabansa ti fokus ngagai anak menua pesisir lebuh nyulut dalam bidang pelajar.

“Enti sema anak ba kandang menua pesisir nyulut dalam peresa UPSR, sida diberi peluang nampung pelajar ba sekula entarabansa enda ngira raban bansa enggau pengarap.

“Tu hak anak datai ari menua pesisir lebuh silibus subjek diperati seikas Cambridge,” ku iya lebuh nyaut tanya ari Abdul Yakub Arbi rambau Aum Kedua Renggat Keempat Dun Ke-18 ditu, ensanus.

Kenu ku Annuar, jaka baru ditumbuh kena 17 Mei 2017, Opis Menteri Pelajar, Sains enggau Pansik Teknologi beratka pemansang pengereja pengawa nyengkaum raban pengajar.

“Kitai ngagihka belanja RM15.7 juta ungkup program ketuai sekula enggau matih pengajar ti ngajar subjek sains, teknologi,injinir enggau matematik (Stem).

“Nambahka nya, kitai ngagihka belanja RM11 juta dikena matih bala pengajar ti ngajar subjek Sains enggau Matematik ngena jaku English bepun taun baru,” ku iya nerang silik.

Nangkan nya ku iya, Perintah Sarawak ngagihka belanja RM342 juta dikena nyendiaka perengkaguna sekula taja pelajar di baruh tanggungpengawa Perintah Besai nitihka Perambu Semilan.

“Pia mega, di baruh inisiatif transfomasyen menua pesisir, 60 buah sekula mujur diseleti lalu RM50 juta dikena nyambung bekal kuasa karan ba sekula nya.

“Kelimpah ari nya, 33 buah sekula bulih pemaik ari bekal ai beresi ti udah disambung ngagai sekula nya,” ku Annuar.