KUCHING: Perintah Besai dikearap ulih berundingka pematut ngaga Balai Bomba enggau Penyah Penusah (BBP) kategori E kelebih agi ba menua pesisir enggau ulu nitihka gaya rampa menua Sarawak.

Menteri Muda Kaunsil Kandang Menua enggau Pengawa Berumah, Datuk Dr. Penguang Manggil madah, taja sebedau tu kala dibantai tang nyentuk diatu nadai inisiatif dipejalaika Perintah Besai.

“Aku ngena awak ngarapka Perintah beratika baru perambu nya berundingka pekara tu ungkup Sarawak nitihka rampa menua ditu,” ku Penguang.

Iya mansutka jaku nya lebuh nyaut tanya Martin Ben (GPS-Kedup) di Dun, ditu kemari.

Dulu ari nya, Penguang madahka agih belanja perambu ngaga BBP ba Pelilih Tebedu enda dikemendar Perintah Besai dalam Langgur Pemansang Malaysia Lumpar ke-11 (RMK-11)taja taba udah dikemendar kena taun 2009 ba Lot 298 Blok 8 Kayan Land District.

“Taja pia, BBP Kategori D ti dipelaba beungkus RM3.5 juta ba Pelilih Tebedu deka dibantaika baru dalam RMK-12.
“Pekara tu beguana amat nentuka kes penusah angus ti majak nambah ba menua pesisir kelebih agi ba rumah panjai ulih dikurang,” ku iya nerang.

Nitihka statistik kenyau tiga taun ke udah, penyampau kes penusah rumah panjai angus chukup ngirauka ati dalam taun 2017 (26 kes), 2018 (24 kes) enggau lima kes nyentuk bulan April taun tu.

Martin dulu ari nya madahka diri berasai asa lebuh BBP Tebedu enda dikemendar.