KUCHING: Genturung pendiau dalam bagi menua Serian nya entara pengentap Bidayuh apin nerima pala tanah Hak Adat Bansa Asal (NCR).

Ku Kaban Kaunsil Nengeri (Adun) Bukit Semuja John Ilus, dalam konstitusyen nya aja bisi bepuluh genturung pendiau iya nya ba sepanjai Jalai Tebakang, Jalai Slabi Mantung Merau, Jalai Gedong enggau genturung pendiau bukai.

“Mengeri Serian nya ditengah kandang menua Dun Bukit Semuja lalu pemansang nya chukup dampih genturung pendiau dia.

“Nya kebuah, ngarapka bisi atur nyukat kelingi tanah enggau meri pala tanah sekalika di baruh Seksyen 6 tauka Seksyen 18, Kanun Tanah Sarawak ulih digaga piak bekaul enggau naka pengelengkas,” ku iya rambau Aum Besai Kaunsil Nengeri (Dun), ditu pagi tadi.

Kenu ku John, ungkup kandang menua Bidayuh, Serakup Nasional Dayak Bidayuh (DBNA) udah ngambi inisiatif ngambi ngatur tanah NCR sida kenyau taun 2017.

Naka diatu, lebih 100 genturung pendiau udah digaga enggau lebuh 50 genturung pendiau udah diripih enggau dibantai ngagai Opis Tanah enggau Survei ungkup ngaku enggau ngeluarka pala tanah.

“Peranak genturung tu udah mutarka semua penanggul garis menua enggau laya entara sida.

“Nya alai, perintah meseti ngerumban ngeluarka pala tanah ngagai sida,” ku iya.

Kelimpah ari nya, John madah enti bisi kandang menua ti dikemansang SALCRA dikena nanam sawit enggau apin diberi pala tanah taja pengawa nyukat kelingi enggau pengempu udah ditemu.