KUCHING: Pengawa nyaga garis entara menua pesisir tebing pantai Sarawak entara elemen beguna dalam nyamin pengelikun enggau pengelantang nengeri.

Adun Samalaju Majang Renggi mansutka pekara tu lebuh bejuraika Rang Undang-Undang Perbekalan (2020) enggau mosyen bagi Resolusyen Angar Pemansang Belanja 2020 rambau Aum Kedua Renggat Keempat Dun Ke-18 ditu, kemari.

“Zon pantai Sarawak diuan 80 peratus ari peranak ti bepanggai ngagai utai ti idup ba kandang menua nya.

“Faktor rampa fizikal ti dinamik, pupu bansa enggau mar ulih ngachau garis entara pesisir pantai Sarawak,” ku iya.
Ku iya, naka tu sitak pesisir pantai dikemansang ketegal penambah peranak bagi tuju ‘penempatan’, mengeri, industri enggau rekreasyen.

“Pesisir pantai Bintulu enggau Samalaju udah dikemansang laban sitak tu nyadi palan industri bepelasarka minyak enggau gis sereta ngembuan dua pengkalan tasik iya nya Pengkalan Bintulu enggau Pengkalan Perindustrian Samalaju.

“Nya alai, Bajet Sarawak 2020 dikearap enggau naka ulih numbuhka Sarawak Coastal Guards ba Zon Perindustrian Kidurong tauka Taman Perindustrian Samalaju ngambika mantu Ejensi Penerit Adat Maritim Malaysia (APMM) nyaga pengelikun pesisir pantai Sarawak,” ku iya.

Dulu ari nya, iya ngarapka ejensi ti ngempu tanggungpengawa ngambi jalai ngelengkaska pengawa nyukat Tanah Adat Bumiputera (NCR).

“Pengawa tu beguna ngambika surat pala tanah NCR jampat agi dikeluarka ngagai sida pengempu.
Nyentukka diatu nadai bisi ripot diterima ti madahka tanah NCR ti disukat ba baruh Seksyen 6 dichuri tauka dirampas perintah baka ti dituduh orang sekeda,” ku iya.

Ba Bajet Sarawak 2020 perintah udah ngagihka RM40 juta dikena nyukat tanah NCR.