KUCHING: Penanggul isu bekal ai ba sitak Balingian, Bukit Goram, Kabong, Meluan, Layar, Engkilili enggau Ngemah deka diputar enggau lengkas.

Menteri Utiliti Datuk Seri Stephen Rundi Utom (GPS-Kemena) madahka pekara tu lebuh nyimpul mosyen opis menteri iya maya Aum Kedua Renggat Keempat Dun Ke-18 ditu, tadi.

“Peneras ai ba sitak Kuala Balingian majak manah pengudah sistem pam pengumpa baru dipejalai ba baruh Projek Rayat ba bulan September tu tadi.

“Pia mega, sitak Bayan Tasik, Setuan, Temesu enggau Bayan Ulu ti diau ba palan tinggi deka digaga ba baruh Projek Rayat Package CR2-Work Order 1 deka dikemanah enggau nambahka sistem bekal ai baka kereja nganti batang paip lama enggau masang pam ‘penggalak’ tangki palan tinggi ti dipelaba tembu bulan Januari 2021,” ku iya.

Ku iya, kereja nyambung bekal ai ba sepemanjai Jalai Ulu Yong ngagai Rumah Jandok ti nelan belanja RM145 juta ba baruh Projek Rayat.

“Tu nyengkaum genturung pasar Kapit lalu dipelaba tembu ujung bulan tu.

“Nangkan nya, Rumah Roland Bangau enggau rumah panjai sepemanjai Jalai Kapit, Nanga Yong ngagai Rumah Robert Ngumbang ba Nanga Sebatu deka dipejurai ba Langgur Pemansang Malaysia Lumpar ke-12 (RMK12),” ku iya.

Tambah Rundi, empat buah rumah panjai di Ulu Roban udah dipasukka ba Projek Bekal Ai Menua Pesisir ba sitak Ulu Roban, Saratok enggau sitak ti agi dalam perati Opis Pemansang Menua Pesisir (KPLB).

“Kelimpah nya, ba sitak Meluan, pengawa ngaga tangki ‘aras tinggi’ di Bukit Aguk udah dikemendarka KPLB ba Projek Bekal Ai Julau Renggat II ke alai diatu benung ba proses berunding.

“Projek bekal ai ba sepemanjai Jalai Nanga Engkamop ngagai Nanga Entaih, Julau diperambu dikerandau ngagai KPLB lalu deka diperunding ba Rolling Plan Four (RP4) 2020,” ku iya.

Bagi sitak Layar Rundi madahka pengawa nukar tauka nganti batang paip ti lama ba kedai, rumah enggau kampung Melayu di Betong deka dibai ngagai RMK12.

Nangkan nya, penanggul sistem bekal ai ba Engkilili deka dipejalai nengah pengawa ngemanahka Loji Bekal Ai Engkilili enggau Loji Bekal Ai Skrang.

“KPLB udah ngemendarka projek bekal ai ngagai Skrang Ili, San Semanju enggau Samueh, kelimpah bekal ai nuju Batang Ai Ili, Lidong, Bangat, Kubal, Skrang Ili Lidong enggau Ulu Skrang ti deka dipejurai ba RMK12 ila.

“Ba sitak Ngemah, bekal ai ngagai menua Mapai, Bawan, Tuah, Pedai, Jih enggau Nanga Tada deka dipansik ba Upper Rajang Development Agency (URDA),” ku iya.