SARATOK: Urung 300 iku mensia mayuh genturung menua besemak Rh.Kuchun Jabey, Nyabor Kabong ditu bisi datai sama ngulu Program Servis Komuniti kemari.

Pemangku Sekretari Kaunsil Pelilih Saratok (MDS) Bilong Engkas madah,program ti baka tu dikena Ejensi Perintah mai berita enggau penerang ke engkeman ungkup rayat menua pesisir.

“Jeman diatu, enti kitai enda bejimat lebih agi ba media rama nyema enda ngenuku ke tiap berita enggau manah tau ngujungka kitai nampung berita enggau penerang ti salah.

“Nya alai, program tu patut alai peranak menua pesisir beambi ulih betanya ngagai tiap ejensi perintah ke bisi sama nyempulang program baka ke sehari tu.

“Pia mega, ngambika ‘Jaku Perintah’ sereta langgur pengawa ti bisi di pejalaika tiap bengkah ejensi perintah di temu rayat.”ku iya.

Bilong madah munyi nya lebuh bejaku meri penerang ungkup mensia mayuh rambau program nya ti diatur ba Rumah Kuchun,Jabey Nyabor Kabong ensana.

Iya mega madah, MDS mega siti ari ejensi perintah ke dikumbai orang PBT sereta ngembuan kuasa ba tikas lumur tiga pengudah Perintah Sarawak (Adun) lalu ditangkan ke Perintah Besai (Rengat Parlimen) ti ngembuan kuasa pengabis besai.

Nengah kuasa nya ku iya, MDS ulih ngatur pemansang ungkup rayat bepanggai sereta bepelasarka tiap polisi ti di gaga bala kaunselor ba tiap bengkah bagi menua di pegai sida.

“Kebuah pia, bala Kaunselor ti udah di padu mangku pengawa deka seruran betemu,berandau sereta ngundang rayat ba tikas baruh sereta berati ke penanggul, pemar, penusah rayat sebedau di bai ngagai aum Kaunsil ngambi ke di pejurai enggau pemesai Opis MDS ” ku iya.

Entara ejensi perintah ti bisi ngambi bagi ba program tu iya nya AADK Betong,JKM Saratok,Kolej Komuniti Betong, Bomba Saratok, AgroBank sereta enggau raban ari Makmal Patologi Sepital Saratok.

Sama bisi datai Adun Kalaka Datuk Abdul Wahab Aziz , Sapit Pengarah Kolej Komuniti Betong, Baizuri Sulaiman enggau bala bukai.