KAPIT: Penyerekang penemu entara Perintah Besai enggau Perintah Nengeri ti majak nyadi tau bendar mangki pengidup rayat mayuh.

Kaban Parti Sarawak Bersatu (PSB) Datuk Kristoffer Nyuak nyadaka pengirau ati meda ulah nya lalu madah, kedua-dua perintah nya mengkang enggau penemu ngaga pemutus ti berat lalu empai enchelak meda penusah ke ditapi rayat lebih agi di menua pesisir.

“Enti nunda sida anang kelalu ngeringka penemu politik diri tang besaup ngaduka penanggul rayat baka rayat di menua pesisir ke udah lama amat betapi enggau penyeranta ti bepanggai pengidup ba pengawa betanam betupi.

“Ambika banding, kedua-dua perintah tu bela udah nemu agi mayuh sekula enggau kelinik di Kapit randaka pemansang lalu tebal agi nadai diadu baka taun 1979 menya maya keterubah digaga,” pia ku iya madah maya ba sebengkah pengerami di Rumah Mamut, Sungai Sut, Kapit, empai lama tu tadi.

Iya madah, di Sarawak, perintah besai enggau nengeri nyemetak bendar udah nemu program pemansang di Kapit kelimpah di menua pesisir ke bukai bekenaka saup sida laban mayuh aset perintah besai digaga ba tanah perintah nengeri.
“Nya alai, projek pemansang ba menua pesisir tu meseti bisi kerejasama ari dua iti perintah tu.

“Tang enti sida majak beserekang penemu rayat enda ngasaika pengidup ke meruan taja nya bisi dipadah maya sida mantaika Bajet menua,” ku iya madah baru.

Ku iya, penyerekang penemu nya enda ulih badu seagi pengari tauka pemesai kedua iti parti nya mengkang enda ditukar laban bela enggai alah penemu enggau pangan diri.

Kelimpah ari nya, Kristofer mega madahka diri enda lantang ati enggau penemu hak ba Kunsil Nengeri (Dun) dipegai siti parti politik aja.

Ku iya, penemu nya bangat salah sereta enda tau nyadi.

“Kebendar iya, parti politik nadai hak ba sesebengkah menua tauka Dun tang sida semina bejalaika pengawa nyadi lambang ngagai siti gempung.

“Sida nadai hak nentuka sapa tauka nagang parti politik ke bukai ditumbuhka ba dini-dini menua.

“Hak tu endang enggi rayat, sida milih sapa sereta nentu sapa bagi pengari rayat lalu enda ngira nama parti politik meseti dipilih rayat empu nengah pengawa ngundi,” pia ku iya sambil madah semua parti politik semina bisi awak lima taun aja megai menua alai rayat deka milih orang baru nyema sida enda gawa enggau manah.

Ba pekara bukai, Kristofer madahka diri berasai temegah ati laban rayat di Kapit mupuk pechayaka iya ulih ngarika sida nengah PSB.

Iya mega andal, sukung rayat ti tegut ngagai iya ti milih deka ngasaika ubah deka nentuka PSB nempa nama ba pegai perintah baru maya Pengawa Bepilih Nengeri ti deka datai.

“Aku ngarapka rayat lebih agi di menua pesisir nemu bagi pekara ke benung nyadi laban enti salah pilih (undi) sida deka ngasaika penanggul.

“Ketegal ngira semua tu mega, PSB mutus nyadi entiti nadai bekaul enggau sebarang parti sereta deka ngemeratka pengelantang pengidup rayat,” ku iya.