KOTA SAMARAHAN: Bisi 92 penyereta ari Sarawak dipilih nyereta Program Tunas Usahawan Belia (Tube) 6.0 ba Kem Pelapes, Universiti Malaysia Sarawak (Unimas).

Kaban Kaunsil Pedagang Mit enggau Jelan Pemesai (PKS) Awang Habiburllah Awang Ismail madahka Perintah Sarawak seruran nyukung pemansang pedagang nengah nyendiaka polisi sereta inisiatif ke pemansang bala pedagang sereta PKS enggau holistik, besepadu sereta ngembuan tuju ti ngena.

“Bala nembiak entara aset ti pemadu beguna dalam menua dalam kitai nyapai tuju Polisi Pengelantang Menua 2030.

“Pemansang nembiak disukung polisi nya ngambika penau bala nembiak ulih ditambahka enggau penuh nengah pengawa dagang, pelajar enggau latih pengelandik,” ku iya.

Habiburllah madah munyi nya lebuh bejadika program nya ba Palan Islam Tun Abang Salahuddin (Pitas), kemari.

Nangkan nya ku iya, pengawa meri fokus tu diveri ngagai bala nembiak dikena nagang penanggul nadai pengawa, ngurangka tikas ekonomi enggau penanggul rama entara mengeri enggau menua pesisir.

“Program Tube dipeda nyadi siti ari chara perintah nyendiaka bala pedagang biak baru ngaul diri dalam industri nya.

“Nengah tu, pengawa dagang ulih nyadi siti pengawa ti difokus kelebih agi lebuh penyampau 4,422 nembiak ti udah dilatih ngaul diri ba pengawa dagang,” ku iya.

Kelimpah ari nya ku iya, pekara tu bela nerima sukung enggau kerejasama strategik ari mayuh bengkah opis menteri, ejensi, bank, gerempung ukai dikuasa perintah (NGO) enggau piak swasta.

Habiburllah mega madah kaul mayuh bengkah piak tu nambahka pengawa dagang ngagai bala nembiak.

“Modul latih bela dikenegapka agi enggau chara canaran ekonomi digital ti bepelasarka pengawa ngena teknologi, inovasyen enggau kreativiti sereta revolusi 4.0,” ku iya nambah.

Bela datai ba pengawa nya Direktor Seksyen Penyambung enggau Pemansang Digital SME Izham Abdullah, Direktor SME Corporation Nengeri Sarawak Ismail Hasyim, Direktor Palan Pemansang Dagang Unimas Prof Madya Dr Mohammad Affendy Arip enggau bala bukai.