KUCHING: Raban ketuai komuniti enggau tuai rumah ari kandang Sitak Kunsil Negeri (DUN) Batang Ai mantah pengawa ketuai ari Pakatan Harapan (PH) ti ditemu sekali agi bejadi projek kuasa solar di Rh. Simon Ng Tutong Ulu, kena 3 November tu tadi.

Tr Albert Klinsing dari Skarok, Lubok Antu madah projek nya udah dulu dipenyadi Menteri Muda Dagang Entarabangsa enggau Industri, Datuk Malcom Mussen ba taun 2017.

“Projek kuasa solar di Rh Simon ke nyadi projek perintah negeri sekali agi dipenyadi kena Hari Minggu, 3 November tu tadi.

“Projek tu sama mega enggau projek kuasa solar di Tapang Pungga sereta Sumpa udah dipenyadi Mussen ba taun 2017.

“Projek tu kebendar ukai projek ari perintah besai, nama kebuah Menteri Kereja Raya Baru Bian bejadika nya baru,”ku Klinsing ba sebengkah pengawa makai lemai ke diatur di Kuching kena malam Hari Lima tu tadi.

Tandu Klinsing, Baru ke nyadi menteri sereta megai portfolio menteri kereja raya patut mai projek baru ngagai peranak di Batang Ai.

Ku iya, kelimpah bejadi projek ke udah lama tembu nya, Baru patut mai projek baru ti tau mai penguntung ngagai rayat baka projek ngemanah jalai Ulu Engkari, Ulu Lemanak enggau Ulu Delok.

“Tu enda, sesen enda meh diberi ngagai Batang Ai. Iya semina datai bejadi projek ke udah lama tembu ke nyadi projek perintah negeri Sarawak.

“Sida ngambu tu projek perintah besai, sengapa deka ngemula sereta nusutka runding rayat,”ku tambah klinsing ke mega Chairman Parti Progresif Demokratik (PDP) pampang Batang Ai.

Jaku Klinsing nya bela disukung Kaunselor Agas Thomas ke mega Sapit Chairman Parti Rakyat Sarawak(PRS) Batang Ai, Tr Tungku anak Surik ke nyadi Chairman Gerempung Tuai Rumah Batang Lemanak enggau Kaunselor Jampi anak Datuk Tutong ke nyadi sapit Chairman Parti Pesaka Bumiputera(PBB) pampang Batang Ai.

Rambau bejadi projek kuasa solar Rh Simon, Baru disempulang Kaban Parlimen (MP) Lubok Antu Jugah Muyang sereta Ketuai pampang Parti Keadilan Rakyat (PKR) Lubok Antu Nicholas Bawin Anggat.

Projek kuasa solar di Rh Simon, Ng Tutong nyadi siti projek kerejasama Sarawak Energy, Agensi Tenaga Korea enggau Opis Menteri Utiliti Sarawak.

Projek dipungkal ba bulan Ogos 2017 lalu tembu digaga ba ujung bulan Disember 2017.