“Nya alai, aku minta perintah tauka ejensi bekaul ngerumban sistem bekal ai beresi tu disambung ngagai rumah panjai ti merinsa nadai bekal ai beresi.”

KUCHING: Perintah tauka ejensi bekaul patut merambu ngaga Sistem Bekal Ai beresi ngagai rumah panjai di Ulu Skrang.

Kaban Kunsil Nengeri (PSB-Engkilili) Dr Johnical Rayong Ngipa madahka mayuh rumah panjai ba menua nya apin ngasaika bekal ai beresi kenyau menua tu udah merdeka.

“Nya alai, aku minta perintah tauka ejensi bekaul ngerumban sistem bekal ai beresi tu disambung ngagai rumah panjai ti merinsa nadai bekal ai beresi.

“Entara sitak menua ke mengkang napi penanggul ai beresi tu nyengkaum menua Skrang Ili, Batang Ai Ili, menua Engkilili baka Rumah Ring, Rumah Mangku, Rumah Langkop, Rumah Sirai enggau menua San Semanju, Merindun, Samueh enggau Rumah Usop Batu Lapan,” ku iya.

Dr Rayong madah munyi nya lebuh bejuraika Rang Undang-Undang Perbekalan (2020), 2019 enggau mosyen Resolusyen Langgur Pemansang ngagai Bajet 2020 ba Aum Kedua Renggat Keempat Dun ditu, kilah ensana.

Kelimpah ari nya, menua Pentik, Skrang, Pais, Tanjong, Lidong Bangat, Kubal, Skrang Ili Lidong nyengkaum menua besemak enggau San Semanju sereta sekula di sitak Engkilili mega betapi enggau penanggul ke sebaka.

Nya alai, Dr Rayong minta Perintah Sarawak nengah Kaunsil Pelilih Lubok Antu (MDLA) meri agih belanja dikena mutarka penanggul trafik ke majak sekut ba pasar Engkilili.

“Penanggul jalai sekut tu majak nyadi ba pasar Engkilili kelebih agi lebuh ujung minggu,” ku iya madah seraya madah pekara tu patut diputar ungkup pengelantang rayat ba sitak tu.