Gaga begunan baru dikena ngemujur siti sesi PdP

KUCHING: Sepenyampau 41 sekula sekondari enggau 25 sekula primari beoperasyen dua sesi berindik ari penyampau tubuh nembiak ngujungka pemutus pelajar sida majak nurun.

Menteri Pelajar, Sains enggau Pansik Teknologi, Datuk Seri Michael Manyin Jawong madahka semua bilik kelas enggau perengkaguna sekula dikena manah ari pagi nyentuk lemai ngujungka kelas tuisyen tauka aktiviti kokurikulum enda ulih diatur.

“Penyampau tubuh nembiak ti mayuh tu ulih ngeruga pengawa ngajar enggau belajar.

“Nya alai, dikena mutarka pekara tu kitai meseti ngaga begunan tambah ungkup perengkaguna sekula tauka ngaga begunan sekula baru,” ku iya.

Manyin mansutka jaku nya lebuh nyimpul jurai opis menteri iya beserimbai enggau Aum Besai Dun Ke-18, ditu ensanus.

Kenu ku Manyin, piak sida enggau Opis Pelajar Nengeri Sarawak (JPNS) udah nyidi sekula ti mayuh nembiak ba selampur menua.

“Tu nyengkaum lima buah sekula primari enggau tujuh buah sekula sekondari ba Kuching lalu sama enam buah sekula primary enggau sekondari di Bintulu enggau Tatau, lapan sekula primari enggau empat sekula sekondari ba Miri, sebuah sekula primari enggau tiga buah sekula sekondari di Samarahan enggau ke bukai.

“Dikena ngelempungka sekula belajar siti sesi, kitai begunaka belanja lalu dikearap pekara tu ulih dperunding Perintah Besai,” terang iya.

Ngelansa pasal penanggul suntuk pengajar ngajar sekeda subjek, Manyin madahka pengajar ti dilatih ngajar mayuh subjek ba Sarawak endang udah chukup.

“Taja pia, bisi penanggul lebuh ngagihka pengajar ngagai sekula nyentuk ke bisi sekeda sekula suntuk pengajar ungkup sekeda subjek.’

“Nya alai, aku minta JPNS berundingka pematut mindahka pengajar dalam pelilih sida empu ngambi enda ngeruga kaul sida sebilik,” ku Manyin nyimpul jaku.