KUCHING: Penemu deka ngempung sekula ti kurang nembiak (SKM) disukung Gerempung Pengajar Sarawak (STU).

Taja pan pia, presiden gerempung, Macky Joseph madah, sebedau pemutus nya dipenyadika mayuh bengkah pekara patut diperatika dulu.

“Keterubah, sekula baru nya meseti ngembuan perengka guna belajar ti kondusif.

“Kebuah pia laban kitai dekaka nembiak belajar enggau lantang ti ukai semina ari pekara belajar tang mega perengka guna ke meruan,” pia ku iya madah, kemari.

Iya mantaika penemu tu dikena nimbal jaku dibantai Menteri Pelajar, Sains enggau Pansik Teknologi Datuk Seri Micheal Manyin ba Aum Kunsil Nengeri (DUN), empai lama.

Maya nya Manyin madah pemutus nutup sekula kurang nembiak (SKM) meseti digaga ari jaku pemutus aum enggau bala apai indai nembiak.

Ku iya, nengah surat ke dianjung pengari rayat, semina mimit aja bala apai indai meri sukung ngagai pemutus nya.

Surat nya minta pengari rayat nanyaka penemu bala apai indai nembiak kelimpah nerangka nama empas SKM ba pelajar anak sida.

Manyin madahka, kelimpah bekenaka puku ti besai, SKM mega enda chukup pengajar.

Naka ke diatu bisi 263 buah sekula digelar SKM di serata nengeri Sarawak ti ulih digempung nyadi 49 buah.

Nambahka jaku iya, Macky madah, nyema pekara nya dipenyadi, SKM ke baru meseti digaga enda kelalu jauh ari sekula lama bepun ari ngira bala nembiak berundang sekula.

Kelimpah ari nya, ku iya penemu apai indai meseti dikemeratka dulu laban nembiak bisi hak nerima pelajar ti efisien.

“Ukai semina, STU ngarapka sistem pengangkut enggau jalai meseti meruan manah ngelawa sekula nya ari genturung menua nembiak ngambika apai indai nadai penanggul nganjung sereta ngambi sida pulai,” ku iya madah baru.

Ba STU, isu ngengkah pengajar gawa mega meseti dikemeranka lebih agi enggau kuota megai mega enggau elawin sida Kepala Pengajar, Penulung Kanan sereta bala pengajar bukai ti bekaul enggau pengawa ngempung SKM tu.